DILI, 02 setembru 2024 (TATOLI) – Servisu Saúde Distritu Belu Atambua, Nusa Tengara Timor (NTT) Indonézia kompromete atu fornese ambulánsia no pesoál médiku sira hodi apoia Timor-Leste perante vizita Amu Papa.
Deklarasaun ne’e hato’o husi Xefe Servisu Saúde Distritu Belu, Maria Ansilla F. Eka Mutty hafoin enkontru ho ekipa saúde husi Sekretariadu Komisaun Institusionál Nivel Altu ba vizita Papa Francisco nian iha eskritóriu Servisu Nasionál Emerjénsia Médika no Ambulánsia (SANEM.IP).
“Ami iha ne’e atu hasoru malu ho koordenadór ekipa médika nian iha Timor-Leste. Ami-nia objetivu maka diskute saida maka ami tenke halo no saida maka ami tenke koordena kona-ba integrasaun implementasaun médiku nian ba Amu-Papa nia vizita”, Xefe Servisu Saúde Distritu Belu, informa ba jornalista sira hafoin enkontru iha eskritóriu SANEM, Caicoli, ohin.
Nia dehan, númeru pesoál médiku husi Atambua ne’ebé sei apoia hamutuk ema 50-resin ne’ebé kompostu husi médiku, enfermeiru, farmasista, ofisiál terenu, ofisiál nutrisaun no kondutór sira, ne’ebé hothotu inklui mós apoiu husi pesoál médiku husi enfermeiru no TNI (Indonézia Ezérsitu Nasionál) ne’ebé espesializa iha saúde.
Pesoál médiku sira sei to’o iha Timor-Leste iha loron 09 fulan-setembru hamutuk ho peregrinu liu 800 hosi Indonézia no sei halo koordenasaun finál antes koloka iha fatin refere no sei fila fali iha loron 10 fulan-Setembru hafoin tuir misa hamutuk ho Papa Francisco.
“Bainhira ita sei kolabora, ita sei serví ema hotu, ita sei ajuda malu. Ami mós iha ambulánsia neen hosi ospitál públiku sira, hosi TNI no hosi sentru saúde komunitáriu sira ne’ebé mak ekipa tomak ho ai-moruk no ekipamentu sira”, nia hateten
Servisu Saúde Distritu Belu to’o oras ne’e kolabora ona ho Dioseze Atambua hodi halo triajen saúde ba kada peregrinu hodi asegura sira-nia kondisaun fíziku jerál, liuliu halo triajen ba malaria.
Jornalista : Felicidade Ximenes
Editór : Zezito Silva
