DILI, 02 setembru 2024 (TATOLI) – Koordenadór Seksaun Saúde iha Ministériu Saúde, Gustodio Alves de Jesus, informa profisionál saúde hamutuk 800-resin mak prepara ona perante vizita Papa Francisco mai Timor Leste.
“Ami halo ona koordenasaun, kolaborasaun no mobilizasaun ba saida mak ekipa saúde nasionál halo ona iha semana rua ba kotuk, iha koordenasaun ho komisaun organizadora mak ita monta ona postu saúde 20 iha Tasi-Tolu iha areadór sira misa nian no profisionál saúde ne’ebé ami prepara ba vizita Santo Padre ne’e hamutuk 800 to’o 1000 atu halo atendimentu iha momentu loron tolu, hahú 09-11 setembru”, Gustodio Alves de Jesus, dehan ba TATOLI iha SNAEM.IP Caicoli, ohin.
Nia esplika, preparasaun ne’e, ekipa sira halo mós ospitál temporáriu ho objetivu atu fó atendimentu bainhira sarani ruma monu iha ne’eba, se atende labele, bele lori ba ospitál nasionál.
Nia subliña, ekipa sira tau mós post saúde iha Dili laran hamutuk 24, hodi atende ba peregrinu sira lao ain, balun oin halai ka monu karik, ekipa saúde sira halo atendimentu kedas.
“Ita mós tau post saúde iha Dili laran hamutuk 24, ida-ne’e la troka sentru saúde no postu saúde sira iha loron tolu ne’e, HNGV sentru saúde no postu saúde sira la’o nafatin, maibé ita tau nafatin post saúde ne’eba iha dalan sira ba peregrinasaun sira lao, ezemplu sira kolen ka ulun moras ita halo atendimentu primeiru sokoru kedas. Tanba iha post saúde sira ne’e ita tau profisionál saúde sira hanesan médiku, enfermeiru, tékniku aliadu, ema voluntáriu sira tanba ita mós koordena ho ekipa saúde husi PNTL ho F-FDTL sira atu apoiu”, nia informa.
Nia adianta, prediksaun ne’ebé mak ekipa seksaun saúde simu husi Komisaun Organizadora ba peregrinu sira hamutuk rihun atus haat, entaun ekipa saúde koko haree ba ida ne’e, atu Ministériu Saúde prepara rekursu umanu ba ida-ne’e.
“Agora ba opsitál temporáriu ne’e ita monta ona kama no ekipamentu balun no ita sei hein aban ka bairnua ita koko kompleta liután ba sasan sira ne’ebé mak ita seidauk iha, tanba ita halo kolaborasaun ho CVTL, SABEH, PNTL no F-FDTL, sira-nia ekipa saúde atu suporta ita iha momentu ida ne’e”, nia subliña.
Nia hateten, post saúde iha Dili laran ne’ebé ekipa saúde tau iha dalan peregrinasaun ne’e mak hanesan iha prizaun Becora, Kuluhun, Bidau, Merkadu Lama, Lahane iha Hali-Laran nian siginfika tau iha dalan protokolu sira tanba perigrinador sira sei liu ne’eba tanba ne’e profisionál saúde sira prontu atu atende.
“Ha’u husu ba perigrinadór sira husi munisípiu no Dili laran katak, bainhira ba tuir misa iha Tasi-Tolu ita hotu hatene katak agora daudaun rai manas, mak tenke halo prevensaun hanesan tenke lori sapeu, oklu, bee tanba rai manas labele uza ropa metan, maibé uza ropa seluk ne’ebé mak sente seguru no konfortavel nune’e bele halao perigrinasaun ho di’ak”, nia konklui.
Jornalista : Felicidade Ximenes
Editór : Zezito Silva
