Doutór Espesialista hosi Austrália halo operasaun ba pasiente ibun-sakat iha Baucau
BAUCAU, 03 setembru 2024 (TATOLI) – Doutór Espesialista hosi Austrália hala’o konsulta no operasaun ba pasiente ibun-sakat iha Ospitál Rejionál Eduardo Ximenes (HoREX, sigla portugés) Baucau.
Prezensa doutór espesialista iha área Plastic Surgeon iha munisípiu Baucau iha loron-segunda, 02 setembru ho misaun atu halo konsulta inklui identifika ne’ebé presiza halo opersaun ba pasiente hamutuk na’in-30.
“Ami rejista hotu depois doutor sira mak halo dezisaun opera agora ka muda fali ba tempu seluk, hein tinan to’o mak halo operasaun, ne’e defende dezisaun hosi doutor sira,” Pesóal enfermeira HoREX Baucau, Maria Helena hateten iha Vila Nova, tersa ne’e.
Doutór espesialista hosi Austrália hamutuk na’in-lima no apoia tan hosi doutór timor an husi Ospitál Nasionál Guido Valadares (HNGV, sigla portugés) ne’ebé iha loron dahuluk deside halo ona operasaun ba pasiente hamutuk na’in-10.
Hosi pasiente na’in-30 ne’e maihusi idade zero to’o joven ne’ebé tuir planu sei realiza atividade referida durante loron-neen, ne’ebé prosesu rejistrasaun iha loron-domingu no kontinua konsulta no operasaun iha loron segunda to’o sesta, 06 setembru.
“Pasiente na’in-10 mak komesa operasaun iha loron dahuluk,” Maria Helena akresenta.
Abilio da Silva, nu’udar aman ba pasiente Rosalina espresa sentimentu kontente ho prezensa doutór espesialista husi Australia tanba konsidera prezensa doutór espesialista iha Baucau lori besik saúde ba komunidade no bele halo tratamentu gratuita ba pasiente ne’ebé sofre ibun-sakat iha Baucau.
“Ami la ba dook buka doutór atu halo operasaun, espera sei rekipera fali oan nia kondisaun ibun-sakat,” Abílio da Costa argumenta.
HoREX apela ba komunidade sira atu hakbesik aan tanba sei kontinua loke rejistrasaun ba pasiente sira-ne’ebé presiza atu halo tratamentu ligadu prezensa doutór espesialista iha Baucau.
Jornalista : Natalino Belo
Editór : Evaristo Soares Martins
