DILI, 03 setembru 2024 (TATOLI)–Komandante Forsa Tarefa Konjunta, Koronel Dobu, hateten membru Falintil-Forsa Defeza de Timor-Leste no Polísia Nasionál Timor-Leste (PNTL) hamutuk 4.000 mak sei halo seguransa ba iha vizita Papa Francisco iha Timor-Leste iha 09 to’o 11 setembru 2024.
“Total aprovasaun ne’ebé mak iha, PNTL iha 2.500 no F-FDTL 1.500, nune’e totál hamutuk 4.000,” Komandante Forsa Tarefa Konjunta, Koronel Dobu, hateten ba jornalista sira liuhusi konferénsia imprensa iha Motael, tersa ne’e.
Ekipa konjunta mós sei koloka elementu forsa defeza no seguransa ba fatin importante sira-ne’ebé tuir planu Papa Fransisco sei vizita, no fatin konsentrasaun hodi halibur sarani sira husi munisipiu.
“Ami tau seguransa iha fatin sira hanesan Tasi-Tolu, Katedrál, Sentru Konvsaun Dili, no Rezidénsia Asosiasi Lembaga Misionari Awam (ALMA) iha Pantai Kelapa no iha Nunsiatura,” nia dehan.
Forsa defeza sei apoiu ba seguransa nasionál liuliu iha tranzitu sira ba dalan protokulu sira-ne’ebé Amu Papa atu liu, no dalan protokulu sira-ne’e sei taka ba públiku durante oras rua hanesan oras ida antes no depois Santu Padre liu.
Sekretáriu Estadu Komunikasaun Sosiál, Expedito Dias Ximenes, reforsa dalan sira Amu Papa liu ne’e mak sei taka ba públiku.
“Ezemplu Amu Papa ba CCD, dalan ne’e taka. Se Papa ba Tasi-Tolu, dalan ne’ebé Santo Padre liu ne’e sei taka. Bainhira dalan ne’ebé Papa la liu ne’e, sei loke ba públiku halo movimentu,” nia hateten.
Jornalista : Jesuína Xavier
Editór : Cancio Ximenes
