DILI, 03 setembru 2024 (TATOLI)–Kongregasaun Asosiasi Lembaga Misionari Awam (ALMA) sai sentru vizita Santu Padre iha nia vizita Pastorál iha Timor-Leste iha 10 setembru dadeersan ne’e, koinside ho kongregasaun ALMA nia aniversáriu ba da-60 (09 setembru 1964-09 setembru 2024) ne’ebé selebra iha kada 09 setembru.
Kongregasaun ALAM harii iha Malang-Indonésia, iha loron 09 Setembru 1964, no iha momentu ne’e ho ema leigu sira hamutuk na’in-neen (6) ne’ebé to’o ikus sai membru ba ALMA.
ALMA harii husi prof. Dr. Hendrikus Janssen, naturalidade ema Olanda ne’ebé moris iha 29 janeiru 1922 no mate iha Malang-Indonézia iha loron 20 Abril 2017. Fundadór ne’e mak padre Hendrikus Janssen husi kongregasaun Missão (CM) ne’ebé harii iha 17 Abril husi São Vicente de Paulo.
Responsável ba Sentru formasaun ALMA, Marta dos Santos, sente haksolok ho vizita sua Santidade Papa Francisco iha sira-nia rezidénsia, tanba ALMA selebra aniversáriu ba da-60 ne’e Papa Francisco mós mai hala’o vizita iha rezidénsia madre ALMA iha Pantai Kelapa, Dili.
“Ami halo tinan 60, ami hetan grasa boot ida, tanba iha 09 setembru, ami halo tinan 60 iha Madiun-Indonézia hodi harii ALMA. Grasa boot husi Maromak nian ho vizita Amu Papa nian, tanba iha kongresaun barak iha Timor-Leste, maibé Amu Papa hili ALMA hodi hala’o ninia vizita pastorál,” nia e hateten ba Agência Tatoli, iha Pantai Kelapa, segunda (02 setembru 2024) ne’e.
Nia dehan, Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, aprezenta ba Papa maibé Santo Padre bele hili ALMA atu sai alvu ba ninia vizita pastorál.
Responsável ba Sentru formasaun ALMA ne’e hateten, ALMA iha misaun pastorál ba Maromak nia emar sira iha munisípiu sira hanesan Ermera no daudaun ne’e ba iha Same, no iha sira-nia vizita pastorál ne’e mak sira konsege koñese labarik sira ho kondisaun limitadu oioin.
“Ami vizita tama-sai uma, iha ne’ebá mak ami koñese labarik sira barak ho defisiensia úniku oioin kuran esprituál no domin no sarani sira. Ami-nia vizita pastorál la’o semana rua dala ida no iha loron boot sira,” nia hateten.
Tuir nia, madre ALMA sira la hela metin iha fatin tanba fundadór ne’e iha hateten “Menjangkau yang tidak terjangkau”, tanba ne’e mak sira hakarak ba terrenu liuliu iha área rurál hodi haree Maromak nia povu.
Nia hateten, ALMA iha misaun halo Maromak nia povu atu hatene, haklaken ba ema sira abandonadu sira, liuhusi ba hela hamutuk ho sarani sira no hakbesik aan ba sarani sira-ne’e.
Marta dos Santos haktuir, labarik sira-ne’ebé inan-aman laiha no moris ho kondisaun limitada ka ema ho defisiénsia sira-ne’e, madre sira tenke haree sira ho papel ida hanesan inan-aman liuliu sira-ne’ebé moris ho madre sira.
“Iha refeisaun hanesan mós ho sira. Ami han tempe, ema hotu han tempe no modo hanesan. Ami reza hamutuk no iha mós retiru anuál hamutuk ho sira hodi moris espirituál bele buras. Ba labarik sira-ne’ebé la haree no la rona, sira mós ativu hotu. Sira bolu madre sira no asvezes sira bolu ama, tanba bolu inan ne’e bensaun ida,” nia dehan.
Serbí ema ki’ak no moris hamutuk ho sira-ne’e, ne’e madre ALMA nia papel liuhusi ba han hamutuk no toba hamutuk ho labarik sira iha sala ka aula boot ida ho kama ketak-ketak, liuhusi ó asisténsia ba sira iha oras 24 nia laran.
“Ami sai inan no aman ba sira, no iha na’in-rua (2) mak akompaña, bainhira labarik sira buka no karik presiza buat ruma,” nia hateten.
Kongregasaun ALMA hahú tama iha Timor-Leste iha tinan 2004, ho membru hamutuk 450, ne’ebé kompostu husi komunidade 56 iha nasaun rua (2) mak hanesan iha Indonézia no Timor-Leste.
ALMA iha misaun boot ida mak evanjeliza ema kbiit-laek sira hanesan haklaken evanjellu ba ema mukit, defisiente no abandonadu sira ho misaun fiar no misaun domin nian liuliu serbí ema mukit sira, partisipa iha misaun sarani (Misio Ad Populum) no kompleta ho misaun povu iha fatin sira-ne’ebé presiza.
Halo Maromak nia povu atu hatene haklaken no moris tuir evanjellu liuliu ba ema mukit no abandonadu sira, tanba membru ALMA iha votu tolu (3) mak hanesan kastidade ka pureza, pobreza no obediénsia ne’ebé moris loro-loron tuir evanjellu nia haruka.
Se asosia ho naran ne’ebé Papa Francisco hili naran foun ne’ebé depoisde eleitu sai Papa iha tinan 2013 iha Conclave Santa Sé Roma nu’udar Papa Francisco, maske pertense ba iha Kompañia Jesus (Jesuita). Jorge Bergoglio hili naran foun Francisco, tanba São Francisco de Asis, saserdote sékulu XIII ne’ebé marka ninia umildade hodi kuidadu ema ki’ak.
Nune’e mós iha orasaun loro-loron madre ALMA sira-nian ne’ebé ho versaun no inspirasaun bazeia ba iha orasaun São Francisco Asis, Madre ka Santa Teresa Calcutá no São Vicente de Paulo nian.
Orasaun serbidór ba ema mukit:
Na’in halo ami sai Ita-Nia serbidór
Iha ne’ebé ki’ak, halo ami sai rikeza domin
Iha ne’ebé moras, halo ami sai servidór ba kura divina
Iha ne’ebé iha defisiénsia, halo ami sai reparasaun
Iha ne’ebé iha obstakulu, halo ami sai servidór ba esperansa
Iha ne’ebé iha neglijiénsia, halo ami sai serví ba fraternidade
Iha ne’ebé iha luxuria no sala, halo ami sai serví ba pureza
Iha ne’ebé iha problema, halo ami sai portadór ba entreteinamentu
Iha ne’ebé iha tristeza, halo ami serví ne’ebé lori alegria
Iha ne’ebé iha violénsia, halo ami serví ba jentileza
Iha ne’ebé iha xantajen, halo ami sai portadór ba jenerozidade ka laran luak
Iha ne’ebé iha violasaun direitu uamnu, halo ami serví ba justisa
Ami-nia Na’in, ami hakarak sai servidór duké emak mak serbí ami
Ami hakarak kuida duké kuida ami
Kompreende duké sai komprendidu
Hadomi duke se domin, tanba fó ami bele simu no ami perdoa ami sei perdaun
Serbí ema ki’ak, ami koñese Maromak Rasik nafatin ba nafatin, amen.
Vizaun ALMA nian mak halo evanjellu evidente no efetivu ba mukit sira otas ne’e (tempu agora) nian, tuir ezemplu no espiritu São Vicente de Paulo liuliu hamutuk ho Kristu no Na’in Feto hanesan modellu ba membru ALMA tomak.
Madre ALMA sira iha virtude ualu (8) mak hanesan simplisidade, hakraik aan, fuan mamar, mortifikasaun (Mati Raga), espiritu servisu ba klamar, armonia, alegria no domin ba servisu.
Iha pontu lima ne’e, vida espirituál madre ALMA mak hanesan meditasaun diária, le sagrada eskritura, Eukaristia no orasaun universal iha igreja, ezame interiór no autoformasaun no deliberasaun regulár.
Iha atividade moris loro-loron, Madre ALMA sira kuidadu labarik sira-ne’ebé moris ho kondisaun defisiénsia iha aspetu oioin ne’ebé konta husi Madre Marta dos Santos
Atualmente labraik sira ema ho defisiensia iha kondisaun oioin hamutuk 18 ne’ebé hela no iha labarik sira ho kondisaun atuistizmu ne’ebé hela iha li’ur ka ho familia ne’ebé hala’o sira-nia formasaun no terapia iha Madre ALMA sira.
Jornalista : Jesuína Xavier
Editór : Cancio Ximenes
