VIQUEQUE, 03 setembru 2024 (TATOLI)- Progresu konstrusaun obra fíziku ba sistema melloramentu bee-moos ba komunidade Postu Administrativu Lacluta atinje pursentu 80 (%).
“Projetu bee-moos implementa iha postu Lacluta ita haree la’o di’ak tebes no progresu instalasaun atinje 80%. Agora ami hein de’it tanke rezervatóriu tanba empreza Luminár responsavél foin cor rintel no pondasi mós hotu ona, tanke sei lori husi nasaun Austrália. Ami-nia tarjetu ne’e, projetu ne’e sei ramata iha fulan-Outubru”, Koordenador Bee Timor Leste, Empreza Publika (BTL,E.P) Munisipiu Viqueque, Marito da Costa, hateten ba Agênsia Tatoli, iha postu Viqueque Vila, tersa ne’e.
Ba projetu, nia dehan BTL,E.P halo ona pagamentu faze dahuluk, loloos tama ona ba faze daruak, maibé empreza maka lakohi sira hakarak servisu hotu maka halo pagamentu tanba ne’e sira seidauk submente dokumentu pagamentu ba BTL,E.P hodi prosesa pagamentu.
“Nune’e projetu Lacluta ami kontinua akompaña ita mós destaka supervaizór ida iha ne’ebá hodi tau matan ba projetu referida”, nia hato’o.
Projetu melloramentu sistema bee-moos ba Postu Administrativu Lacluta husi foho Bibileo huun ho distánsia kilométru 4,5 ho kustu $582.100. Projetu referidu sei benefisia ba abitante Lacluta ne’ebé hela iha Postu Lacluta Vila, area Suku Dilor ho total populasaun 4.158 ka Uma-Kain 693.
Entertantu, Konstrusaun sistema bee-moos ba postu Ossu daudaun ne’e atinje ba 74 %, implementa iha fulan-marsu-2022, iha munisipiu Viqueque iha postu administrativu Ossu ho empreza responsavel projetu mak CDFG Unipessoal Lda.
lha kontratu ne’e, Empreza harii tanke foun tolu, reabilita tanke tolu no dada kanu husi bee matan ba Ossu Vila, ho kustu $421.903,57. Projetu ne’e sei fó benefisia ba populasaun 2.850 husi uma-kain 475 ne’ebé pertense iha postu administrativu Ossu.
Jornalista : Vitorino Lopes da Costa
Editór : Florencio Miranda Ximenes
