DILI, 04 setembru 2024 (TATOLI)–Prezidente Autoridade Munisipiu (PAM) Dili, Gregorio Saldanha, hateten durante loron tolu (09-11 setembru 2024) Papa Francisco hala’o vizita Estadu no pastorál iha Timor-Leste, ekipa servisu saneamentu no empreza sira sei la halo atividade rekolla lixu iha kapitál Dili.
Autoridade ne’e husu ba populasaun sira iha kapitál Dili atu kontribui ba vizita Papa Francisco iha Timor-Leste ne’e hodi labele soe lixu arbiru, tanba durante loron tolu ne’e dalan ba Tibar ne’e taka.
“Ami husu ba populasaun hotu atu rai sira nia lixu provizoriamente iha sira-nia rezidénsia iha loron 09 to’o 11 setembru nakait ho vizita Amu Papa nian,” Prezidente Autoride (PA) munisipiu Dili, Gregorio Saldanha, hateten ba jornalista sira liuhusi konferénsia, iha Caicoli.
Gregorio Saldanha hateten, autoridade munisipiu fo sai ona sirkulár ida ba autoridade lokál sira atu bele avizu populasaun kona-ba soe lixu ne’e.
“Ita iha kompeténsia atu dirije ita-nia autoridade postu administrativu, suku no aldeia hodi atua, orienta no organiza ita-nia povu hodi depozita lixu iha sira fatin. Ita halo sakrifisiu uitoan, depois Santu Padre fila mak ita soe,” nia dehan.
Nia dehan, ekipa saneamentu no empreza sira rekolla lixu sira-ne’e mós autoridade munisipál fó hatene ona atu labele halo movimentu ba rekolla lixu iha kapital durante vizita Amu Papa nian.
Jornalista : Jesuína Xavier
Editór : Cancio Ximenes
