Governu aprova revizaun estatutu ofisiál PNTL
DILI, 04 setembru 2024 (TATOLI) – Governu liuhusi reuniaun Konsellu Ministru (KM), kuarta ne’e, iha Palásiu Governu Dili, aprova revizaun ba projetu dekretu-lei relasiona ho Estatutu Ofisiál Polísia ba Polísia Nasionál Timor-Leste (PNTL), ne’ebé aprova tiha ona iha Reuniaun Konsellu Ministru iha loron 29 fulan-maiu 2024.
“Esbosu dekretu-lei, agora revizaun, mantein objetivu atu estabelese Estatutu Ofisiál Polísia PNTL foun, ho objetivu atu reforsa regulamentu sira ne’ebé iha ona. Entre mudansa sira ne’ebé maka introdús destaka redefinisaun husi kritériu sira promosaun nian, ho énfaze ida iha meritokrasia, no esklaresimentu husi inkompatibilidade sira iha ezersísiu husi funsaun sira polísia nian,” tenik iha nota ne’ebé Agência TATOLI asesu hosi portál Governu.
Adisionalmente, pozisaun lideransa sira iha PNTL hetan ajustamentu hodi hatán di’ak liután ba instituisaun nia ezijénsia organizasionál no operasionál atuál.
Diploma ne’e reflete importánsia atu garante polísia nasionál ida ne’ebé profisionál, formadu no estruturadu, ho intensaun atu konsolida Estadu Direitu no promove demokrasia iha territóriu nasionál.
Jornalista: Hortencio Sanchez
Editór: Florencio Miranda Ximenee
