DILI, 04 Setembru 2024 (TATOLI) – Arsebispu Arkidioseze Metropolitana Dili, Dom Virgílio Kardeál do Carmo da Silva, fó bensaun ba ambulift ka kamiñaun ho elevadór ba defisiente fíziku sira, sentru klíniku no sala Very Very Important Person (VVIP) iha Aeroportu Internasionál Prezidente Nicolau Lobato, Dili.
“Loron besik daudaun ona bá vizita amu Papa nian. Momentu ida ksolok ba ita hotu ho preparativu simu Sua Santidade nian no vigáriu Kristu nian”, Dom Vírigilio hateten iha Aeroportu Prezidente Nicolau Lobato, ohin.
Kardeál agradese ba Governu, liuliu Primeiru-Ministru, Kay Rala Xanana Gusmão, Prezidente Repúblika, José Ramos Horta, ne’ebé serbisu maka’as ba preparasaun vizita amu Papa nian.
Arsebispu kontinua konvida sarani sira hotu atu reza no prepara “ita-nia aan hasoru Santu Padre ne’ebé sei to’o mai ita-nia rai”.
Iha fatin hanesan, Prezidente Repúblika, José Ramos Horta, apresia preparasaun husi Governu no igreja hodi simu Sua Santidade nia vizita pastorál iha loron 09 to’o 11 Setembru.
“Parabéns ba Governu no igreja, ba hothotu, ba preparasaun infraestrutura fízika hodi simu amu Papa”, Ramos Horta hateten iha nia diskursu.
Xefe Estadu ne’e dehan iha ona obra fízika sira hanesan iha Tasi-Tolu no sala Very Important Person (VIP) iha aeroportu nian ne’ebé tékniku Ajénsia Dezenvolvimentu Nasionál observa.
Iha atividade fó bensaun ba ambulift no sala VIP ne’e marka prezensa husi Primeiru-Ministru, Xanana Gusmão, Prezidente Repúblika, José Ramos Horta, Núnsiu Apostóliku Vatikanu iha Timor-Leste, Monseñór Marco Sprizzi no funsionáriu sira.
Lembra katak Papa Francisco sei vizita Timor-Leste entre loron 09 to’o 11 Setembru. Iha vizita ne’e, iha segunda, 09 setembru 2024, iha tuku 11h40 oras Papua Nova Guiné (10h40 otl), Papa Francisco hamutuk ho delegasaun sei semo husi Aeroportu Internasionál Jacksons Port Moresby mai Dili, Timor-Leste, no tuir oráriu sei to’o iha Aeroportu Internasionál Nicolau Lobato, Comoro, iha tuku 14h10. Depoizde ne’e, Papa ho nia delegasaun sei bá deskansa iha Nunsiatura Apostolika iha Motael, Dili.
Hafoin ne’e, iha tuku 18h00, Papa Francisco ne’ebé hanesan Xefe Estadu Vatikanu nian sei bá iha Palásiu Prezidensiál Nicolau Lobato, Bairru Pite, hodi hala’o enkontru ho Prezidente Repúblika, José Ramos Horta.
Iha Palásiu Prezidensiál Nicolau Lobato, iha tuku 19h00 kalan ne’e, Papa Francisco sei lee nia diskursu ne’ebé partisipa husi Xefe Governu no membru Governu, sosiedade sivíl, korpu diplomátiku no konvidadu sira seluk hafoin fila hikas ba Nunsiatura Apostolika Motael.
Iha tersa, 10 Setembru 2024, iha 08h45 dadeersan, Papa Francisco sei vizita labarik sira ema ho defisiénsia (moras autis) ne’ebé hela iha orfonatu ne’ebé madre sira husi kongregasaun Asosiasi Lembaga Misionaris Awam (ALMA) mak hamatan, iha Pantai Kelapa, Dili.
Iha tuku 09h30, Papa Fransico sei halo sorumutu ho bispu, padre, madre, diákonu, seminarista no katekista sira iha igreja Imaculda Conceição Katedrál Vila Verde, Dili. Ida-ne’e sorumutu ofisál ho igreja Katólika iha Timor-Leste ne’ebé la’o durante oras ida nia laran no Papa sei halo diskursu.
Iha tuku 10h45, Papa sei halo sorumutu ho padre na’in-38 husi kongregasaun Jesuita iha Timor-Leste iha rezidénsia Nunsiatura Apostolika iha Motael, Dili.
Iha tuku 16h30 lorokraik, Papa Francisco sei prezide misa solene iha Tasi-Tolu ne’ebé tuir planu sei partisipa husi sarani sira hamutuk 700.000 ne’ebé mai husi dioseze Dili, Baucau no Maliana, inklu peregrinu sira husi Nusa Tenggara Timur (NTT)-Kupang-Indonézia no Austrália. Tuir planu, misa ne’e la’o durante oras ida ho balun de’it no sarani sira simu komuñaun kala la’o minutu 10 nia laran.
Iha kuarta, 11 Setembru 2024, iha tuku 09h30, Papa Francisco sei hala’o sorumutu no sei fó diskursu ba reprezentante joven katóliku husi dioseze Dili, Baucau no Maliana hamutuk 3.000 ne’ebé maihusi kada parókia, no sorumutu ne’e la’o durante oras ida nia laran iha Sentru Konvensaun Dili (CCD, sigla portugés).
Hafoin sorumutu ne’e, iha tuku 10h45, sei halo serimónia despedida iha aeroportu Internasionál Prezidente Nicolau Lobato, Comoro, Dili, antes Papa ho delegasaun semo bá Singapura.
Jornalista: Jesuína Xavier
Editora: Maria Auxiliadora
