DILI, 04 setembru 2024 (TATOLI)–Ministériu Edukasaun (ME) hili Eskola Ensinu Sekundáriu Jerál (ESJ) 04 setembru UNAMET ba implementasaun programa pilotu djitalizasaun.
“Ita tinan oin mak sei tau programa pilotu ida iha eskola ensinu sekundáriu ne’e ho modelu di’ak tebes iha Dili laran. Dijitaliza eskola ensinu sekundáriu sira, liu-liu eskola 04 setembru. Tanba ne’e mak investimentu lubuk ida sei prevee iha Orsamentu Jerál Estadu (OJE) tinan oin mai, tanba iha OJE ne’e ami sei tau barak liu atu sosa ekipamentu elektróniku, komputadór no projetór sira,” Sekretáriu Estadu Ensinu Sekundária Jerál no Tékniku Vokasionál, Domingos Lopes Lemos, hateten hafoin partisipa serimónia aniversáriu Eskola ESJ 04 setembru ba dala-20, iha Balide, kuarta ne’e.
Governante ne’e dehan, bainhira dijitaliza eskola públiku ne’e, profesór sira sei la utiliza ona kuadru maibé uza komputadór no projetór.
“Ne’e profesór sira la presiza uza jis hodi hanorin ona tanba ita tama ona faze dijitalizasaun, entaun ita sei tau komputadór barak iha eskola ne’e inklui projetór nune’e profesór sira uza projetór hodi hanorin. Ita mós iha planu atu estudante sira sei ezame online, ita tenke dijitaliza ona,” nia akresenta.
Aleinde ne’e, loron 04 setembru sai loron padroeiru ba Eskola ESJ 04 setembru UNAMET, tanba ne’e presiza halo reflesaun no hametin istória.
“Tanba ne’e tempu ba imi estuda no apreende matéria sira-ne’ebé profesór sira fó. Husu ba estudante 04 setembru UNAMET atu halo reflesaun ba istória ne’ebé eroi sira kuda hela. Ha’u husu ba estudante sira katak atu hanoin hikas filafali 04 setembru 1999 liubá, ho situasaun ne’ebé mais difísil tebes to’o ohin loron ita hetan ukun rasik-an husi rezultadu Konsulta Populár 30 agostu nian,” Sekretáriu Estadu, katak.
Notísia relevante : Estudante Eskola 04 Setembru sai vensedora kompetisaun lee poezia rezisténsia
Nune’e, governante ne’e husu ba estudante atu konsentra estuda no apreende matéria husi profesór sira, tanba profesór sira uluk la matenek hanesan estudante sira, agora estudante hatene buat barak.
“Imi aproveita didi’ak ami sira ne’ebé idade avansadu ba daudaun ona, tanba ne’e husu ba imi hakmatek atu estuda, foku ba estudu ho di’ak no aproveita di’ak matéria ne’ebé imi-nia profesór sira fó hodi dezenvolve imi-nia matenek iha futuru, tanba ita-nia nasaun ne’e presiza tebes imi,” nia dehan.
Diretór Eskola ESJ 04 setembru, Sérgio da Cruz, orgullu ho planu ME nian no konsidera di’ak tebes tanba hahú dezenvolve eskola sekundáriu jerál.
“Maibé molok atu implementa programa ne’e, Ministériu Edukasaun presiza hadi’a uluk infraestrutura iha eskola 04 setembru, tanba infraestrutura iha eskola ne’e problema hela, liu-liu janela, odamatan, inklui mós morru protesaun sira. Tanba ita atu dezenvolve eskola ruma ou implementa programa ruma iha eskola ne’e tenke garante uluk infraestrutura eskola, nune’e planu hotu ne’ebé ita hakarak implementa ne’e tenke susesu,” Diretór tenik.
Diretór eskola konsidera, loron ohin importante tebes tanba husu atu hamutuk banati tuir istória ne’e.
“Ohin loron ha’u sente katak loron espesiál tebes tanba ami-nia eskola tama ona tinan 20. Tanba ne’e loron importante hodi hateke ba futuru hodi hein saida mak sei mosu mai, maibé presiza hamutuk hodi dezenvolve rai ida-ne’e ba oin. Tanba ne’e, save mak estudante sira,“ nia salienta.
Eskola ne’e uluk misaun Nasaun Unida ho naran UNAMET mak halo knaar no halo ligasaun ho INFORDEPE. Entaun, eksola ne’e iha istória ida iha tempu pasadu.
Jornalista : Osória Marques
Editora : Julia Chatarina
