Ministériu Saúde tenke haforsa rekursu umanu ba primeiru sokoru iha fronteira
DILI, 04 setembru 2024 (TATOLI) – Médiku Jerál iha Polísia Nasionál Timor-Leste, Honorio Horta Pinto, husu ba Ministériu Saúde atu haforsa rekursu umanu hodi halo primeiru sokoru iha área fronteirisa, atu labele lori moras MPOX mai iha Timor-Leste.
“Ita-nia preokupasaun mak ne’e, tenke reforsa ita-nia rekursu umanus hodi halo primeiru sokoru iha área fronteira, atu labele lori moras MPOX mai iha ita-nia rain”, Honorio afirma bainhira partisipa iha workhsop iha Tmor-Leste iha Timor-Plaza, ohin.
Nia dehan, migrasaun no mós Ministériu Saúde tenke tau primeiru sokoru iha mota ain, atu evita ema tama no sai hodi lori moras sira ne’e mai Timor-Leste.
“Atu haforsa iha parte ida, ita tenke liu husi koordenasaun atu prevene moras ida ne’e tenke servisu makas hodi nune’e moras ne’e labele tama mai iha ita-nia rain”, nia afirma.
Nia relembra, autoridade relevante sira halo ona sensibilizasaun ba komunidade sira iha fronteira kona-ba moras MPOX ida-ne’e.
Iha fatin hanesan, Xefe Vijilánsia Epidemolojia, Isabel Maria Gomes, informa iha loron 13 fulan-Agostu 2024, OMS deklara ona emerjénsia públika globál signfiika iha nasaun seluk iha Áfrika, Indonézia sira akontese ona moras MPOX ida-ne’e. Entaun ida-ne’e sei prepara rekursu umanus hodi tau iha ne’eba hodi halao servisu.
“Ita agora seidauk iha kazu MPOX maibé husi parte Ministériu Saúde, ita presiza halo vijilánsia hodi tau atensaun banhira moras ne’e akontese iha ita-nia rain, ita prontu ona atu responde ba situasuan ida-ne’e”, Isabel Maria Gomes konklui.
Jornalista : Felicidade Ximenes
Editór : Zezito Silva
