Opozisaun husu SEATOU trata negosiante ambulante ho dignu

DILI, 04 setembru 2024 (TATOLI)—Deputadu opozisaun FRETILIN, David Dias Ximenes “Mandati’’, husu Sekretária Estadu Toponímia Organizasaun Urbana (SEATOU) ho serbisu guarda jestaun merkadu munisípiu Dili atu trata negosiante ambulante ho dignu hodi kria kondisaun di’ak ba sira atu bele buka moris.
“Loos duni, ita-nia ema sira iha ne’eba. Ema kle’ur ona ba avizu la book aan no hala’o nafatin negósiu, maibé sira mós iha razaun ida. Loloos, labele duni de’it hanesan ne’e. Primeiru, aranja tiha fatin, depois dezloka sira ba ne’eba ho kedas fasilidade hodi sira buka moris. Ami la dehan ida-ne’e di’ak ka lae, maibé ita-nia ema tenke buka moris,” Mandati hateten ba jornalista sira iha sala bankada iha Parlamentu Nasionál (PN), kuarta ne’e.
Nia lamenta ho atuasaun serbisu husi ekipa konjunta Seketária Estadu Toponímia Organizasaun Urbana (SEATOU) ho serbisu guarda jestaun merkadu munisípiu Dili, uza atuasaun forsa ne’ebé trata negosiante sira lahó dignu duni no baku rahun negosiante sira-nia sasán.
Ida-ne’e sentimentu umanu oinsá, nia dehan, povu kiik liuliu negosiante sira buka moris, ida-ne’e hamate povu kiik hanesan negosiante kiik ninia rendimentu atu sustenta nesesidade família loro-loron ne’e mak hetan estragu.
“Bele husu fali ba sira. Alokasaun iha tiha ona merkadu, maibé tanbasá sira faan nafatin iha ne’eba. Hanoin, sira mós presiza fatin estratéjiku, oinsá mak ema sosa sasán,” nia dehan.
Deputadu CNRT, Duarte Nunes, hateten kona-ba atuasaun ne’ebé iha baku rahun negosiante sira-nia sasán ne’e la’ós foin akontese maibé kle’ur ona akontese.
Tanba ne’e, ba atuasaun ekipa SEATOU nian se halo sala bele lori ba Tribunál, maibé hanoin SEATOU kumpre nia kna’ar buka hadi’a sidade Dili no iha territóriu.
Nia dehan, bankada Governu apoiu programa Governu nian liuhusi SEATOU organiza sidade Dili ne’e sai moos no organizadu.
Tuir nia, hanoin merkadu Manleuana no Taibesi ne’ebé Governu kria sei iha fatin atu tau negosiante sira-ne’ebé kontinua fa’an sasán iha dalan ninin, hanesan iha área Kampung Baru-Comoro, Bairru Pite ho seluk tan.
Tanba, nia dehan, faan iha dalan ninin halo engarafamentu, nune’e presiza koopera tanba dalabarak ona hato’o avizu maibé negosiante sira la koopera hodi kontinua utiliza espasu públiku liliu iha estrada ninin hodi faan sasán.
Jornalista : Nelson de Sousa
Editór : Cancio Ximenes

