JAKARTA, 04 setembru 2024 (TATOLI) – Amu Papa Francisco simu ho serimónia ofisiál iha Palásiu Prezidensiál Istana Merdeka, Jakarta, Indonézia, ohin dadeer, mais ou menus tuku 9.38, oras Jakarta.
Santu Padre simu direta hosi Prezidente Repúblika Indonézia, Joko Widodo, no akompañia husi líder nasionál seluk, líder relizioza oi-oin, korpu diplomátiku, sosiedade sívil no Komunidade husi grupu relijioza oioin.
Hafoin tuun husi karreta mutin Toyota Innova Zenik, Amu Papa lolo kedas liman ba komunidade sira hodi kumprimenta sira ho hamnasa.
Antes hakat ba Palásiu laran ho kadeira roda, Papa Francisco kaer-liman ho Prezidente Widodo ho espresaun hamnasa.
Iha serimónia ofisiál referida Prezidente Joko Widodo hamriik iha Amu Papa Francisco nia sorin karuk, enkuantu komunidade sira entusiazmu tebes hodi simu Santu Padre ho hit Bandeira Vatikanu kór mean no mutin no Bandeira Indonézia mean no mutin hodi hananu inu nasionál Vatikanu no Indonézia.
Komunidade husi grupu relijiaun oioin simu Amu Papa ho hatais tradisionál oioin ne’ebé mak reprezenta Indonézia nu’udar nasaun ne’ebé iha toleránsia aas ba kultura no relijiaun oioin hodi moris hamutuk iha pás no establidade.
Jornalista: Filomeno Martins
Editór: Rafael Ximenes de A. Belo
