DILI, 05 setembru 2024 (TATOLI)–Diretór Ezekutivu Forum Organizasaun Naun Governamental Timor-Leste (FONGTIL), Valentim da Costa Pinto, hateten atuasaun ida-ne’e intervensaun ida la estratéjiku ne’ebé afeta ba imajen Estadu no Governu nian, liuliu ba períödu preparasaun ba simu vizita Amu Papa mai Timor-Leste.
Nia husu ba Governu atu kria kondisaun uluk ba negosiante sira, molok halo atuasaun hodi muda negosiante sira faan sasán iha espasu públiku sira iha kapitál Dili.
“Ami ko’alia iha tempu barak ona katak Governu iha nia obrigasaun atu kria kondisaun ne’ebé dignu liu, maibé kondisaun sira-ne’ebé ajuda nia sidadaun sira iha ambiente protejidu. Ezemplu, estende tan merkadu sira atu iha oportunidade hetan espasu hanesan negosiante hodi hala’o atividade negósiu,” Diretór Ezekutivu FONGTIL, Valentim da Costa Pinto, hateten ba Agência Tatoli, iha Caicoli, kinta ne’e.
Diretór ne’e hateten, sira-ne’ebé lahalo negósiu, Governu kria kondisaun mínimu atu hetan mahon ida hodi hela ba, tenke kria kondisaun uluk molok implementa polítika ba espasu públiku sira hodi Governu halo dezenvolvimentu.
“Saida mak ita halo ne’e ita-nia povu tenke sente seguru no moris ho kondisaun ida dignu, trata sira-nia direitu ho di’ak. Ida-ne’e Estadu nia obrigadasaun,” nia dehan.
Nia considera, atuasaun ekipa Sekretaria Estadu Asuntu Toponímia no Organizasaun Urbana (SEATOU) brutál hasoru vendedór sira iha rotunda Comoro ne’e la umanu no la promove ambiente segurua iha preparasan atu simu Papa Francisco nia vizita mai Timor-Leste.
“Intervensaun Governu nian liuhusi SEATOU atu regula atividade públiku sira liuliu ba ita-nia negosiante sira-ne’ebé intervensaun sira-ne’e halo ho brutál. Ladún promove ambiente seguru ba preparasaun Timor nian ba vizita Xefe Estadu no lidere Universál igreja katolika nian, Sua Santidade nian mai ita-nia rai,” nia dehan.
Tuir nia, atuasaun ladun promove polítika Prezidente Repúblika nian kona-ba fraternidade umana Timor-Leste.
“SEATOU laiha kapasidade atu jere sira-nia autoridade hodi halo jestaun ba movimentu públiku. Atuasaun fó kondisaun triste no lakon esperansa ba ita-nia sosiedade, ita-nia sidadaun no populasaun ki’ik sira kontinua lakon esperansa ba servisu públiku sira,” nia dehan.
Nia esplika, SEATOU bele ba ko’alia atu fó hatene loron ka oras hanesan ne’e labele faan iha espasu públiku, la’ós ba estraga ema-nia sasán tanba lei kona-ba espasu públiku ne’e la dehan atu estraga sasán maibé atu ba regula no orienta atu sai, la’ós ba baku ema.
Aleinde ne’e, nia sujere ba Polísia Nasionál Timor-Leste (PNTL) atu husik hala’o kna’ar jornalizmu nia ho livre ho independente.
“Ha’u hanoin PNTL sira labele repressivu ba maluk jornalista, sira tenke respeita kna’ar jornalista nian. PNTL tenke fó oprtunidade halo kobertura ba atividade hotu. Labele limita sira, maibé ajuda sira-nia movimentu la’o ho livre,” nia dehan.
Tanba, nia dehan, públiku presiza hetan informasaun husi jornalista nia transmisaun ba atividade husi servisu públiku.
Jornalista : Jesuína Xavier
Editór : Cancio Ximenes
