DILI, 05 setembru 2024 (TATOLI)–Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, husu ba Governu atu halo atuasaun hasoru negosiante ambulante sira iha Kampung Baru Comoro ho di’ak no uza fuan.
Arsebispu ne’e hateten, ema hotu sente hakfodak ho akontesimentu agresaun fiziku hasoru negisiante ambulante ne’e, tanba hamosu violénsia ida.
“Ita hotu sente hakfodak ho akontesimentu ida-ne’e, maibé sira-ne’ebé hala’o asaun ida-ne’e hodi halo violénsia hodi buat ruma hasoru vendedór sira iha dalan ninin. Ita hotu nu’udár timoroan haree no rona sente moras no kanek, terus no laran susar, bainhira haree no rona. Ita hein labele akontese beibeik situasaun sira hanesan ne’e, ita husu uza ita-nia fuan ba atuasaun sira iha terenu,” Arsebispu Arkidioseze Metropolitana Dili, Dom Virgílio Kardeal do Carmo da Silva, SDB, hateten ba jornalista sira nakait ho atuasaun ekipa Sekretária Estadu Asuntu Toponímia no Organizasaun Urbana hasoru vendedór sira iha rotunda Comoro nian iha tersa (03 setembru 2024) liubá ne’e, iha Akait, kinta ne’e.
Tuir Kardeál, situasaun bele evita atu labele akontese iha ambiente preparasaun atu simu Papa Francisco ninia vizita Estadu no vizita pastorál durante loron tolu (09-11 setembru 2024) iha Timor-Leste.
“Ita lakohi atu akontese, maibé sira hasoru violénsia no sente lakon no hetan asaun violénsia. Ha’u hanoin ita lakohi akontesimentu sira-ne’e mosu, liuliu iha ambiente festa fiar no povu nian. Ita haree fó impaktu ladún di’ak ba sarani sira hanesan ne’e,” nia hateten.
Jornalista : Jesuína Xavier
Editór : Cancio Ximenes
