DILI, 05 setembru 2024 (TATOLI) – Ministériu Saúde (MS) hamutuk ho Organizasaun Mundiál Saúde (OMS) iha Timor-Leste halo inagurasaun ba Sentru Komandu no Kontrolu iha Hospitál Nasionál Guido Valadares (HNGV) no fatin operasaun emerjénsia kampu temporária iha Tasi-Tolu.
“ohin loron, ita halo inagurasaun ba Sentru Komandu no Kontrolu iha Hospitál Nasionál Guido Valadares (HNGV) no fatin operasaun emerjénsia kampu temporária iha Tasi-Tolu. Iha eventu ida-ne’e sai hanesan etapa signifikativu neʼebé halo parte esforsu husi ekipa Ministériu Saúde halo hamutuk ho ita-nia parseiru dezenvolvimentu hodi kontinua fortalese kapasidade ita-nia bainhira iha emerjénsia saúde”, Vise Ministru Fortalesimentu Instituisaun Saúde Jose Magno, informa iha HNGV, ohin.
Nia dehan, esforsu atu estabelese sistema jestaun saúde emerjénsia iha Timor-Leste marka konsiderável ona progresu hanesan hotu hotu hatene katak estabelese Sentru Operasaun Emerjénsia Saúde ka Sentru Komandu no Kontrolu iha HNGV no fatin operasaun emerjénsia kampu temporária iha Tasi-Tolu.
“Instalasaun hirak ne’e krusiál tebes ba vizita Amu Papa maibé atu hasae ita-nia kapasidade atu responde ba saúde emerjénsia iha futuru iha nasaun tomak. Inisiativa ida-ne’e hanesan parte husi esforsu ho apoiu husi OMS, mak hanesan parseiru xavi ba estabelesimentu Sentru Operasaun Emerjénsia iha munisípiu sira hanesan iha tinan 2020 iha SNAEM, 2021 iha RAEOA, 2022 iha Ainaro, 2023 iha Lautem. Sentru ida-idak hirak ne’e iha papel importante atu asegura katak ita preparadu duni no iha kapasidade atu jere krize saúde ho efetivu”, nia informa.
Nia afirma, modelu Sentru Operasaun Emerjénsia mak hanesan modelu dezeñu ba sentru enkuadramentu ba jestaun emerjénsia. Ida-ne’e atu kordena responde ba emerjénsia médika, moras hada’et no moras la hada’et mak bele mosu derepente no bele fó ameasa ba vida humana, inklui moras transmite husi ai-han la seguru, dezastre naturál, krize sosiál, asidente no kanek.
“Maibé ita observa tiha ona katak iha lakuna balun iha ita-nia infraestrutura informasaun, komunikasaun no teknolojia, aleinde limitasaun relasiona ho koñesimentu no abilidade husi pesoál saúde kona-ba ferramenta sira.
“Ita sei fó orientasaun kompreensivu kona-ba oinsá atu utiliza fatin Operasaun Emerjénsia, no nia foku partikulár kona-ba uzu aplikasaun software nesesáriu ba rekolla, relata no jere kazu insidente hirak ne’eb’e iha. Ho aumentu koñesimentu no abilidade pesoál saúde nian ho objetivu atu hasa’e kualiade prestasaun servisu saúde ho efisiénsia no efetivu”, nia relata.
Iha fatin hanesan, Reprezentante Organizasaun Mundiál Saúdeiha Timor-leste, Arvind Mathur, informa instalasaun HEOC iha HNGV no HEOC kampu temporária iha Tasi-Tolu ne’e, hanesan marku miliáriu ida ne’ebé signifikante iha esforsu atu fortalese Timor-Leste nia infraestrutura emerjénsia saúde nian.
“Inisiativa ida-ne’e la’o kona-ba resposta imediata ba vizita Amu Papa ne’ebé sei mai, maibé mós fortalese ita-nia kapasidade atu maneja no responde ba emerjénsia saúde iha rai laran. Sentru komandu ida-ne’e bele sai hanesan pilar ida ba estratejia hodi maneja krize ruma. Ida-ne’e asegura katak ita bele re-organiza no koordena rekursu imediatu, kumunika efetivamente no responde desizivamente ba emerjénsia ruma, bele dezastre naturál, krize saúde, ameasa ba seguransa públika ka konflitu sosiál ruma”, Arvind Mathur esplika.
Nia hateten, liu husi esforsu sentralizadu, bele minimza kustu, salva vida no rekupera lalais ba situasaun normál, asegura katak komunidade bele reziliente bainhira enfrenta dezafiu sira ne’ebé mak la espera.
“Ohin, ami sente orgullu aumenta HNGV ba sitema ida-ne’e atu asegura katak Timor-Leste preparadu ho estratejia responde di’ak tebes ba saúde emerjénsia oioin. HEOC mak sentrál ba jestaun emerjénsia ho di’ak. No ha’u iha konfiansa ida-ne’e sei iha benefísiu ba Departamentu Emerjénsia, ekipa responde rápidu no ekipa vijilánsia iha Dili, SNAEM no OMS nia offisiál saúde públika iha kampu. Hamutuk, ita sei kontinua atu haforsa ita-nia resposta saúde emerjénsia no asegura futuru mak seguru no saudavel liu ba Timor-Leste”, nia haktuir.
Diretora Ezekutiva HNGV, dehan sorumutu ohin nian ho objetivu mak inagura Sentru Operasaun Emerjénsia Saúde ne’ebé mak apoia husi OMS. Sistema ida-ne’ebé sei fasilita halo relatóriu akontesimentu sira iha HNGV.
“Ita fiar sistema ne’e rasik, sei hasa’e kualidade atendimentu iha servisu emerjénsia lha HNGV no Timor-Leste. Iha loron hirak liu ba, funsionáriu lubuk mak hetan ona koñesementu, oinsá mak atu uza sistema refere. Ha’u fiar, sira iha koñesimentu naton ona atu utiliza. Maibė, sistema instalasaun HEOC la’os dahuluk. Maibé antes ne’e halao ona iha RAEOA, Ainaro no Lautem hahú tinan hirak liubá no hetan instrusaun, ida-ne’e hatudu sira iha esperiénsia hodi utiliza sistema ne’e”nia konklui.
Espasu hanesan edifísiu administrasaun tuan ne’ebé reabilita atu prepara ba vizita Amu Papa ohin, empreza nasionál Caeklin entrega ona ba Ministériu Saúde hodi utiliza ba atende VIP sira karik presiza asisténsia ba saúde. Iha edifísiu ne’e ekipamentu hanesan kama hamutuk 18 inklui medikamentu sufisiente atu atende kazu sira iha ambitu vizita Amu Papa nian mai Timor-Leste.
Jornalista : Felicidade Ximenes
Editór : Zezito Silva
