BAUCAU, 05 setembru 2024 (TATOLI) – Komunidade Muslim Munisípiu Baucau konsidera prezensa Papa Francisco atu hametin liután toleránsia interrelijiozu no kria fraternidade iha Timor-Leste.
Autoridade Iman Miskita Al-Amal Munisípiu Baucau, Haji Faisal Saleh, sente kontente, ho konsiderasaun hosi Governu no Igreja Katólika iha Timor-Leste ne’ebé konvida komunidade Musulmanu iha Timor atu partisipa vizita Papa Francisco iha Timor-Leste ne’ebé konsideradu nu’udar símbolu fraternidade.
“Importánsia hosi joven Musulmanu atu hasoru malu ho Papa Francisco ne’e kria amizade no fraterna umanu, kria toleránsia umanu ne’ebé di’ak, maske Amu Papa mai Timor maioria katóliku, maibé ba povu Timor tomak,” Haji Faisal hateten iha Vila Nova, kinta ne’e.
Maskita Al-amal rasik sei koloka joven Musulmanu hosi munisípiu Baucau hamutuk na’in-tolu husi totál na’in-12 hodi partisipa iha diálogu ho Papa Francisco iha Sentru Konvensaun Baucau (CCD, sigla portugés).
Maske Haji Faisal Saleh senti triste tanba laiha karta ruma atu partisipa iha sorumutu ho Papa Francisco maibé prezensa líder másimu Vatikanu ne’e nu’udar ba sidadaun hotu-hotu inklui komunidade Musulmanu iha Timor-Leste.
“Amu Papa nee la’ós tinan tinan mai, maibé tuir tempu tertentu ne’ebé mai la haree ba kór, la haree ba rasa, maibé mai ba ema hotu,” Haji Faisal akresenta.
Haji Faisal, hateten, komunidade Musulmanu sira hotu hakarak atu partisipa, tanba vizita Papa Francisco la’ós ba de’it sarani katóliku, maibé ba povu Timor tomak maibé iha Timor-Leste la kria kondisaun no trata ema hotu hanesan bainhira kompara ho nasaun Indonézia.
Líder Miskita Al-Amal, argumenta, liuhusi bensaun Papa Francisco sai símbolu unidade entre líder nasionál sira inklui hamutuk ho povu nune’e bele kria pas no estabilidade hodi dezenvolve Timor-Leste.
“Prezensa Papa Francisco sei sai bensaun di’ak liután ba ita hotu. Bele motiva ita, tanba ita mesak labele, entaun ema-boot mai bele hadi’a ita di’akliu,” Haji Faisal hateten.
Nia dehan, líder nasionál sira seidauk fó liman ba malu tanba diferesa polítika nune’e ho vizita Papa Francisco bele motiva atu loke fuan haree malu di’ak, tanba, bele fo impaktu ba komunidade sira iha baze.
“Ita haree buat balun la’o laloos, entaun ne’e mos bele motiva ita-nia Governu sai di’ak liután,” Haji Saleh akresenta.
Haji Saleh iha esperansa ho prezensa sua santidade Papa Francisco iha Timor-Leste sei hametin domin iha ema idak-idak nia fuan.
Prezensa Papa Francisco iha Timor-Leste tuir oráriu sei halao durante loron-tolu, loron-09 to’o 11 setembru ne’ebé sei lori mensajen importante ligadu ho tema hanesan fraternidade entre ema nune’e bele iha toleránsia no unidade.
Jornalista : Natalino Belo
Editór : Evaristo Soares Martins
