Papa vizita TL: Governante sira halo reflesaun ba situasaun reál povu nian
DILI, 05 setembru 2024 (TATOLI)–Diretór Ezekutivu, Luta Hamutuk, José Alves da Costa, hateten vizita Papa Francoisco iha Timor-Leste ne’e governante sira tenke halo reflesaun ba iha sira-nia governasaun hodi haree situasaun reál povu nian, iha vizita Papa Francisco mai Timor-Leste ne’e.
“Ita ida-idak reflete ita-nia aan, tanba prezensan Amu Papa nian hanesan illas Kristu nian, entaun ita tenke ho fuan no laran mós atu simu sua Santidade nia prezensa ho hakmatek. Ha’u hanoin, sua Santidade nia prezensa mai iha ne’e hanesan bensaun ida no orgullu boot ida povu Timor-Leste. Tanba, sua santidade João Paulo II mai Timor-Leste iha 1989, liu tiha tinan 35, ne’ebé iha tempu rezisténsia ita konsege hetan ukun rasik aan,” Diretór Ezekutivu Luta Hamutuk, José Alves da Costa, hateten ba Agência Tatoli, iha Faról.
Nia esplika, agora prezensa Papa nian daruak mai iha ne’e ho Timor-Leste nia kondisaun mizeravel tebes iha pobreza nia okos, bele muda povu nia moris iha futuru mai, ida-ne’e povu nia esperansa tanba konsulta populár ba tinan 25 no tinan 22 restaura independénsia.
“Povu kontinua moris hakdasak ho dezempregu ida-ne’e mós reflesaun boot ida. Ha’u hanoin prezensa sua Santidade Papa, ema boot no ukun-na’in sira sei ba tuur iha oin. Ne’ebé, espera katak prezensa sua Santidade Papa nian bele fase sira-nia kakutak aat sira no hanoin aat sira atu lori sira ba dalan loos no justu, hodi lori povu ba moris di’ak no prosperu,” nia hateten.
Tuir nia, se ida-ne’e mak lakonsege entaun povu lahetan benefisiu ruma husi vizita Santu Padre nian.
“Ita-nia esperansa mak reflesaun, saida mak halo, ko’alia saida, to’o iha ne’ebé ona no oinsá ona no saida mak atu halo no muda iha prezensa sua Santidade nian. Atu servi di’ak ita-nia povu,” nia hateten.
Iha fatin seluk, Diretór Ezekutivu Forum Organizasaun Naun Governamental Timor-Leste (FONGTIL), Valentim da Costa Pinto, hateten dahuluk agradese ba vizita Papal ba da-rua Amu Papa nian husi igreja katólika nian tanba nasaun Timor-Leste kiik ne’ebé hetan oportunidade bele hetan vizita.
Nia relembra, vizita dahuluk iha tinan1989 husi João Paulo II mai Timor-Leste no agora tinan ida-ne’e Papa Francisco hala’o vizita Pastorál nu’udar lider universál igreja Katólika no Xefe Estadu Vatikanu.
“Ne’e hatudu katak ita iha oportunidade ida bele hetan bensaun no grasa no vizita ida-ne’e bele ajuda ita-nia Estadu bele define dalan ida di’ak-liu hodi dezenvolve ita-nia rai Timor ho di’ak-liu. Tanba, ita-nia rai enfrenta hela dezafiu kona-ba problema ki’ak, mánutrisaun, dezempregu no injustisa sosiál no ekonomia iha ita-nia sosiedade,” Diretór Ezekutivu Forum Organizasaun Naun Governamental Timor-Leste (FONGTIL), Valentim da Costa Pinto, ba Agência Tatoli, iha Caicoli.
“Ita espera katak vizita sua Santidade ne’e ajuda ita atu hetan grasa no bensaun hodi hili no define dalan ida di’ak-liu hodi dezenvolvimentu la’o diák-liu. Seluk mós, vizita ida-ne’e fanu ita hodi bele promove di’ak liután hodi hametin ita-nia unidade no dame hahú husi ita-nia líder sira no sosiedade hotu bele kria unidade, fiar no toleránsia iha ita-nia rai. Esperansa ida-ne’e ami hakarak,” nia dehan.
Jornalista : Jesuína Xavier
Editór : Cancio Ximenes
