DILI, 05 setembru 2024 (TATOLI)-Prezidente Parlamentu Nasionál (PPN), Maria Fernanda Lay, hateten vizita Sua Santidade Papa Francisco nu’udar Xefe Estadu Vátikanu no Lidér Katóliku mundiál nian ne’e lori grasa mai Timor-Leste.
Notísia Relevante: Koñese Papa Francisco, Líder espirituál no mundiál
“Ha’u hanoin vizita ida-ne’e, ita bele hateten grasa Nai Maromak ninian. Santu Padre mai vizita ita-nia rain, tanba imajina ho idade ida-ne’e nia mai, konserteza povu Timor-Leste ne’ebé maioriatariamente Katóliku bele analiza didi’ak mensajen Santu Padre nian ne’ebé hato’o Que a vosa fé seja a vossa cultura, ne’e hakarak hatete saida. Depois, ita haree mós vizita Santu Padre nian iha Indonézia simples tebe-tebes, ne’ebé ita espera katak preparativu sira-ne’e bele komprova katak ita preparadu atu simu Santu Padre,” nia hateten ba jornalista sira iha resintu Parlamentu Nasionál, kinta ne’e.
Líder másimu órgaun soberania daruak ne’e apela ba sarani no timoron tomak atu kria pás iha situasaun hakmatek hodi simu vizita Amu Papa.
“Nune’e mós estabilidade rai-laran hodi bele simu Amu Papa mai ita-nia rain. Ida-ne’e importante, tanba sei reflete la’ós ita-nia populasaun maória katóliku, maibé ita-nia fuan ho laran hodi simu iha pás nia laran,’’ nia apela
Oráriu Papa Francisco vizita Timor-Leste
Iha segunda (09 setembru 2024, iha tuku 11h40 oras Papua Novaguine no oras loloos iha TL ne’e 11h40, Papa Francisco hamutuk ho delegasaun sei voo husi Aeroportu Internasionál Jacksons Port Moresby Papua Novaguine mai Dili-Timor-Leste no tuir oráriu sei to’o iha Aeroportu Intgernasionál Nicolau Lobato, Comoro, iha tuku 14h10.
Antes ne’e, Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten hafoin Papa Francisco to’o iha aeroportu Comoro, Papa ho nia delegasaun sei simu husi Xefe Estadu no Governu no bispu sira iha Timor-Leste, hafoin ne’e Papa sei ba deskansa iha Nunsiatura Apostolika iha Motael, Dili.
“Vizita pastorál ne’e hanesan vizita pastorál ida-ne’ebé la’o dook tebes no kle’ur liu, tanba Papa Francisco tenke vizita Indonézia, Papua Novaguine, Timor-Leste no Singapura. Tanba ne’e, iha aeroportu internasionál Prezidente Nicolau Lobato, Comoro, la simu ho serimónia simu nian ne’ebé kle’ur tanba Papa kolen, nune’e Papa ba liu Nunsiatura Apsotolika iha Motael,” Dom Virgílio Kardeál hateten iha sorumutu ho voluntáriu sira, iha DIT.
Hafoin ne’e, iha tuku 18h00 lorokraik, Papa Francisco ne’ebé hanesan Xefe Estadu Vatikanu nian ne’e sei ba iha Palásiu Prezidensiál Nicolau Lobato, Bairru Pite, hodi hala’o enkontru ho Prezidente Repúblika, José Ramos Horta. Iha oras hanesan, Primeiru-Ministru, Kay Rala Xanana Gusmão, sei hasoru malu ho ninia omologu Kardinal Pietro Parolin, ne’ebé sei la’o durante minutu 20 nia laran.
Iha Palásiu Prezidensiál Nicolau Lobato, iha tuku 19h00 kalan ne’e, Papa Francisco sei lee ninia diskursu ne’ebé partisipa husi Xefe Governu no membru Governu da-sia (IX), sosiedade sivil, korpu diplomátiku no konvidadu sira seluk hafoin fila hikas ba Nunsiatura Apostolika Motael.
Iha tersa (10 setembru 2024), iha tuku 08h45 dadeersan, Papa Francisco sei vizita labarik sira ema ho defisiénsia (moras autis) ne’ebé hela iha orfonatu ne’ebé madre sira husi kongregasaun Asosiasi Lembaga Misionaris Awam (ALMA) mak hamatan, iha Pantai Kelapa, Dili.
Iha tuku 09h30, Papa Fransico sei halo sorumutu ho bispu, padre, madre, diaknu, seminarista no katekista sira iha igreja Imaculda Conceição Katedrál Vila Verde, Dili. Ida-ne’e sorumutu ofisál ho igreja Katólika iha Timor-Leste ne’ebé la’o durante oras ida nia laran no Papa sei halo diskursu.
Iha tuku 10h45, Papa Francisco sei halo sorumutu ho padre na’in-38 husi kongregasaun Jesuita iha Timor-Leste iha rezidénsia Nunsiatura Apostolika iha Motael, Dili.
Iha tuku 16h30 lorokraik, Papa Francisco sei prezide misa solene iha Tasi-Tolu ne’ebé tuir planu sei partisipa husi sarani sira hamutuk 700.000 ne’ebé maihusi dioseze Dili, Baucau no Maliana inklu peregrinu sira husi Nusa Tenggara Timur (NTT)-Kupang-Indonézia no Austrália. Tuir planu, misa ne’e la’o durante oras ida ho balun de’it, no sarani sira simu komuñaun kala la’o minutu 10 nia laran deít.
Jornalista : Nelson de Sousa
Editór : Cancio Ximenes
