PR sei hato’o mensajen ba povu iha abertura sesaun solene lejislativa daruak iha PN
DILI, 05 setembru 2024 (TATOLI)—Parlamentu Nasionál (PN), konvida Prezidente Repúblika (PR), José Ramos Horta, hodi hato’o mensajen ba povu Timor-Leste iha abertura sesaun solene abertura sesaun lejislativa daruak iha lejislatura daneen iha 16 setembru 2024.
“Ohin, ha’u konvoka reuniaun líder bankada hodi deside kona-ba sesaun solene iha 16 setembru ne’ebé Prezidente Repúblika sei hato’o mensajen ba povu, liuhusi Parlamentu Masionál,” Prezidente Parlamentu Nasionál, Maria Fernanda Lay, hateten ba jornalista sira hafoin ramata reuniaun líder bankada iha Parlamentu Nasionál, kinta ne’e.
Enkuantu, Parlamentu Nasionál (PN), iha 15 Jullu hahú tama resesu no tuir oráriu sei tama fali iha 15 setembru 2024.
Lejislatura ida iha mandatu tinan lima no sesaun lejislativa lima, ba lejislatura daneen ne’e kompleta ona sesaun lejislativa dahuluk no agora atu tama ba sesaun lejislativa daruak.
Antes tama resesu PN konstitui Komisaun Permanente hodi asegura nafatin funsionamentu órgaun soberania daruak ne’e iha períodu resesu.
Aleinde ne’e, durante resesu PN sei hala’o de’it reuniaun plenária semana ida dala ida iha loron tersa-feira, maibé la taka dalan ba ajenda importante sira iha plenária estraordináriu ruma bainhira Prezidente PN mak iha kompeténsia atu foti hodi marka trata ka diskute asuntu importante ruma.
Tuir konstituisaun artigu 102 (Komisaun Permanente), hateten Komisaun Permanente halo la’o serbisu nafatin iha períodu ne’ebé Parlamentu Nasionál para hela, iha intervalu sesaun no mós iha kazu seluk-seluk previstu iha Konstituisaun.
Komisaun Permanente nia ulun-boot mak Prezidente Parlamentu Nasionál nian hariik husi Vise-Prezidente sira no partidu sira-nia Deputadu, tuir fahe-baluk reprezentasaun nian iha Parlamentu Nasionál.
Kompete ba Komisaun Permanente, mak akompaña serbisu sira Governu nian no mós administrasaun nian, koordena serbisu sira komisaun nasionál nian, promove konvokasaun Parlamentu Nasionál nian, prepara no organiza Parlamentu Nasionál nia sesaun sira, autoriza dezlokasaun Prezidente-Repúblika iha rai-laran, dirije Parlamentu Nasionál nia relasaun ho parlamentu no instituisaun análoga sira iha rai-seluk no autoriza deklarasaun Estadu serku nian no Estadu emerjénsia nian.
Jornalista : Nelson de Sousa
Editór : Cancio Ximenes
