DILI, 05 setembru 2024 (TATOLI) – Sarani hamutuk na’in 15,000 husi munisípiu Ermera sei partisipa misa iha Tasi-Tolu, Dili ne’ebé prezide direita hosi Santidade Papa Francisco, iha loron-tersa, 10 setembru, tuku 16:00 lokraik.
Prezidente Autoridade Munisípiu Ermera, José Martinho dos Santos Soares, informa, tuir oráriu sarani sira-ne’e sei dezloke ba fatin konsentrasaun Tibar iha loron-segunda, 09 setembru, semana oin.
“Ami ba vizita tiha ona, señór Primeiru Ministru rasik tún ba haree tiha ona fatin ho komisaun altu nível, preparasaun di’ak, agora mobilizasaun sarani sira-nia mak ami hahú loron 08 setembru, hotu-hotu mai konsentra iha Gleno, depois dia 09 ami dezloka mai Dili, sira mai dala-ida de’it,” nia informa ba jornalista sira iha Dili.
Nia hatutan, daudaun ne’e autoridade munisípiu rejista karreta unidade 248 ne’ebé sei tula peregrinu sira, maibé sei presiza aumenta tán, tanba peregrinu munisípiu Ermera mai ho númeru boot.
“Iha postu balu sarani barak mak mai rejista, ezemplu Letefoho ne’e rejistadu 3,000 no kuaze 4,000, entaun sira iha difikuldade iha transporte, ami husu apoia hosi CCI-TL, emprezáriu balu atubele tulun tán kamioneta balu, nune’e bele lori sira mai Dili no lori fila, ohin ha’u hetan apoia husi Salimagu no seluk tán. Ha’u mós kontaktu ona señór Nilton Gusmão, sira bele aumenta tán transporte adisionál balu ba Ermera,” nia katak.
Kona-ba preparasaun Lojístika, PAM dehan, ekipa Ajénsia Dezenvolvimentu Nasionál (ADN) monta ona tenda, hariis-fatin iha Tibar.
Nune’e mós ekipa sei koordena ho emprezáriu feto sira atu apoia instala dapur, tanba autoridade munisípiu Ermera orienta ona katak konsume ne’e responsabiliza husi sarani idak-idak ho razaun orsamentu ne’ebé apoia husi Governu Sentrál ho montante rihun $40 ne’e la sufisiente.
“Ami fahe tiah ona, ami sura de’it kada pesoa ne’e $2,50, entaun wainhira ami halo revizaun sura fali osan ne’e lato’o, ita aluga karreta, enxe mina de’it mós lato’o tanba kamioneta ne’e ita presiza 300 ka 400,” nia katak.
Enkuantu tuir observasaun Jornalista Ajénsia TATOLI iha terrenu, nota katak daudaun ekipa Bombeiru hahú rega ona rai iha fatin konsentrasaun rotunda Tibar no instalasaun fatin seguransa no postu saúde mós preparadu ona.
Jornalista: Sérgio da Cruz
Editór: Evaristo Soares Martins
