DILI, 05 Setembru 2024 (TATOLI) – Ministériu Agrikultura, Pekuária, Peska no Floresta (MAPPF) haruka tan, iha fulan ne’e, estudante timoroan hamutuk na’in-139 bá Izraél hodi aprende kona-ba agrikultura moderna hodi hasa’e sira-nia koñesimentu iha setór ne’e no bainhira fila mai bele tulun família agrikultór sira iha munisípiu hodi hasa’e produsaun rai-laran.
Estudante na’in-139 sei arranka iha fulan ne’e no sei aprende agrikultura moderna durante fiulan 11, iha área agrikultura, ortikultura, pekuária, mekanizasaun, aprende kona-ba sistema prosesamentu oinsá atu halo embalajen ba produtu ne’ebé prodús, inklui kona-ba sistema negósiu.
Ministru Agrikultura, Pekuária, Peska no Floresta (MAPPF), Marcos da Cruz, dehan objetivu hodi kontinua haruka timoroan sira bá Izraél ne’e liuhusi Programa Arava International Centre Agricultura Training (AICAT) hodi hasa’e koñesimentu joven timoroan sira iha área agrikultura.
“Ita kontinua loke oportunidade ba ita-nia joven sira atu bá aprende nafatin iha Izraél, nune’e joven sira bele hetan koñesimentu adekuadu hodi tulun ita-nia agrikultór sira hodi aumenta produsaun agríkola iha rai-laran”, ministru dehan iha ámbitu serimónia despedida ho estudante sira ne’ebé hala’o iha salaun enkontru MAPPF, Comoro, ohin.
Ministériu Agrikultura kontinua reforsa kooperasaun ho Governu Izraél, tanba Timór iha rai ne’ebé poténsia boot ba agrikultura, tanba ne’e presiza ema ne’ebé iha kapasidade no koñesimentu di’ak atu hasa’e produsaun iha rai ne’e, liuliu iha área téknika atu ajuda agrikultór sira iha munisípiu hodi kuda sira-nia hare no ai-horis sira iha to’os laran.
“Ha’u husu ba imi tenke agradese ba Maromak, tanba husi totál populasaun timoroan [hamutuk 1,3] ne’ebé moris iha nasaun ne’e, imi hetan previléjiu boot hodi bá aprende iha Izraél kona-ba serbisu agrikultura nian”, governante ne’e dehan.
Ministru hameno ba joven sira ne’ebé sei aranka bá Izraél ne’e katak sira hanesan embaixadór, nomós turista ida iha país referidu. Tanba ne’e, buka atu promove Timor-Leste nia rekursu ba Izraél oan sira atu hatene, nune’e sira iha interese bele mai investe hodi esplora rekursu país nian, liuliu rikusoin sira iha rai-maran no iha tasi okos.
Aleinde ne’e, relasiona ho funu entre Izraél no Palestina, governante ne’e asegura katak estudante timoroan sira ne’ebé sei bá estuda ne’e sei lahetan problema, maske nasaun rua ne’e iha hela situasaun funu nia laran.
“Ami deside ona ita-nia dirijente na’in-tolu maka sei akompaña estudante na’in-139 bá to’o Izraél aumezmu tempu atu haree mós kondisaun estudante na’in-50 ne’ebé sei estuda hela iha AICAT”, ministru realsa.
Nia dehan bainhira funu entre Izraél no Palestina-Hamas akontese, inan-aman barak maka mai halo konfirmasaun ho ministériu kona-ba sira-nia oan nian kondisaun, maibé ho kooperasaun serbisu entre MAPPF no Ministériu Negósiu Estranjeiru no Kooperasaun (MNEK) informa katak mezmu Izraél ho Palestina funu, maibé la afeta ba estudante na’in-50 iha Arava, tanba fatin ne’e do’ok tebes husi Gaza.
Ministru mós solisita ba inan-aman estudante sira katak lalika laran-taridu no hanoin barak, tanba Izraél asegura hela estudante sira. “Ha’u husu ba imi na’in-139 katak fatin ne’ebé imi atu bá ne’e iha kondisaun ne’ebé seguru. Mezmu imi rona Izraél ho Palestina funu hela, maibé la afeta ba imi-nia tempu atu estuda”, afirma.
Daudaun ne’e, iha ona joven timoroan hamutuk 548 ne’ebé sai ona alumi ba AICAT, ne’ebé tuir formasaun husi 2015 to’o 2022. Iha 2023 nian, iha estudante hamutuk na’in-50 maka daudaun kontinua estuda iha Izraél no agora na’in-139 maka preparadu atu dezloka iha Setembru ne’e. Sira ne’e sei fila mai Timór iha Jullu 2025.
Estudante sira ne’e mai husi instituisaun 12 mak hanesan eskola tékniku agríkola iha Maliana, Manatuto-Natarbora, Fuiluro-Lautém no husi ensinu superiór mak Universidade da Paz (UNPAZ), Universidade Nasionál Timor Lorosa’e (UNTL), Universidade Orientál Timor Lorosa’e (UNITAL), Institutu Politékniku Betano (IPB) no instituisaun sira seluk ne’ebé iha relasaun ho área agrikultura nian.
Iha sorin seluk, Diretór Nasionál Estensaun no Formasaun Agrikola, Hipólito da Costa, hateten programa ne’e haree liu ba formasaun nian, tanba ne’e husu ba estudante timoroan sira atu aproveita oportunidade ne’e hodi uza tempu ne’ebé iha atu aprende teoria ka siénsia agrikultura moderna hodi pratika di’ak iha área ne’e.
“Estudante timoroan hotu sei hela ho agrikultór sira iha Izraél hodi pratika sira-nia teoria. Tanba ne’e, partisipante sira tenke aproveita oportunidade ida-ne’e hodi aprende esperiénsia foun sira kona-ba teknolojia moderna agrikultura nian no tuirmai bele implementa iha Timor-Leste hodi hasa’e seguransa ai-han iha futuru”.
Iha fatin hanesan, estudante AICAT 2024, Gil Amaral da Costa, husi Fakuldade Agrikultura, Departamentu Agronomia, UNTL, agradese tanba nia bele hetan oportunidade hodi bá estudante iha Izraél atu hasa’e nia koñesimentu iha área agrikultura.
“Ha’u bele hetan oportunidade husi joven timoroan sira seluk, tanba ne’e ha’u sei haka’as-aan atu aproveita matéria sira ne’ebé profesór sira iha AICAT sei fó mai ha’u, nune’e ha’u filafali mai bele kontribui ba dezenvolve setór agríkola iha Timór”, nia promote.
Sentru AICAT mak formasaun servisu agrikultura modernu ida ne’ebé hala’o iha Izraél no kuaze nasaun 14, inklui Timor-Leste maka partisipa ona iha programa ne’e.
Sentru formasaun ne’e kria iha Sapir iha 1994 ne’ebé hetan apoia husi Ministériu Negósiu Estranjeiru no Ministériu Agrikultura Izraél. Sentru ne’e forma, kada tinan, estudante rihun-resin husi nasaun sira Áfrika no Ázia.
Notísia relevante: Alumni AICAT 40% kria ona empregu rasik
Jornalista: Tomé Amado
Editora: Maria Auxiliadora
