DILI, 06 setembru 2024 (TATOLI)—Diretór interinu Asosiasaun Halibur Defisiénsia Matan Timor-Leste (AHDMTL), Gabriel Ponciano de Sousa, lamenta ho komisaun organizadora ba Vizita Papa Francisco tanba la prepara infraestrutura asesível, iha misa solene, iha Tasi-tolu, ba ema ho defisiénsia sira.
“Reprezentante ema ho defisiénsia lamenta ho komisaun organizadora tanba la instala infraestrutura asesível ba ema ho defisiénsia bainhira asesu iha misa solene no la envolve ema ho defisiénsia iha komisaun ne’e. Tanba ita haree iha Indonézia ne’e, ema ho defisiénsia iha oportunidade lee leitura uza letra braille. Limitasaun ba ema ho defisiénsia no la asesível,” Diretór interinu hato’o ba Agência Tatoli, iha FONGTIL, Caicoli, sesta ne’e.
Notísia relevante : Razaun Papa Francisco prezide misa Tasi-Tolu ho lian portugés
Ema ho defisiénsia na’in-100 mak rejistu hodi partisipa misa solene iha Tasi-tolu inklui partisipa mós iha fatin sira ne’ebé Amu Papa sei vizita hanesan Igreja Katedrál no Sentru Konsensaun Dili (CCD, sigla portugés).
“Ami preparadu atu simu ita-nia Sua Santidade Papa Francisco iha loron 09 setembru, iha Tasi-tolu,” nia akresenta.
Nia iha esperansa, Papa Francisco nia vizita Apostólika ne’e mai Timor-Leste bele lori dame no k’solok.
“Husu atu maluk ho defisiénsia sira atu partisipa misa solene ne’e tanba Papa mai. Importante prepara ita-nia mentalidade hodi tuir misa,” nia tenik.
Jornalista : Osória Marques
Editora : Julia Chatarina
