DILI, 06 setembru 2024 (TATOLI)—Membru Parlamentu Nasionál (PN), liuhusi Deputadu bankada KHUNTO, António Verdiál de Sousa, husu parte relevante hotu atu respeita atividade jornalístika iha terenu no labele impede bainhira jornalista sira halo kobertura iha espasu públiku ne’ebé de’it.
Notísia Relevante: AJTL husu labele ameasa jornalista iha kobertura maibé respeita
“Jornalista nia kna’ar hala’o operasaun iha oras 24 nia laran, laiha razaun taka dalan ba sira hasai imajen no video. Imajen ida-ne’ebé lai, se imajen ida hanesan foin daudaun ita haree iha terrenu mak ema barak ko’alia, ne’e hanoin laiha lei atu taka dalan ba jornalista sira foti imajen no video,” Nia hateten ba jornalista sira iha resintu Parlamentu Nasionál, sesta ne’e.
Tan ne’e, nu’udar Deputadu, nafatin enkoraja jornalista sira hala’o kna’ar profisionál, tanba jornalista sira-nia direitu no déver ne’e garante tiha ona iha konstituisaun RDTL artigu 40 no artigu 41.
“Husu ba instituisaun ne’ebé trata asuntu seguransa atu serbisu ho responsabilidade no serbisu tuir de’it regra ne’ebé haruka. Tan ne’e hala’o serbisu tuir ida-idak nia kna’ar, labele halo atuasaun arbiru, bainhira la tuir lei ne’ebé vigora ita-nia rai,” nia hateten.
Deputadu FRETILIN, David Dias Ximenes ‘’Mandati’’, hateten direitu informasaun no liberdade espresaun ne’e iha konstituisaun hatuur ona, nune’e bainhira autoridade sira impede serbisu jornalista ne’e kontra konstituisaun.
“Ne’e direitu konstituisionál, ida-ne’e kontra konstituisaun, Konsellu Imprensa bele foti, hodi haree didi’ak buat sira-ne’e,” nia dehan.
Deputada PLP, Maria Angelina Sarmento, lamenta aktu ne’ebé ameasa no impede serbisu jornalista bele hamate liberdade imprensa no liberdade espresaun iha Timor-Leste.
“Aktu ne’e bele hamate liberdade imprensa no liberdade espresaun, tanba mídia nia papél importante hatutan lian husi lian la’ek sira, hodi públika atu ema bele hatene. Iha atuasaun ne’ebé viola ema-nia direitu atu moris iha rai ida-ne’e foin selebra tinan 20-resin ninia indepedénsia ba liberdade ne’ebé nia hetan, hanoin atuasaun sira-ne’ebé iha presiza jornalista sira atu fó sai,” nia hateten.
Nune’e, Nia husu jornalista sira lalika ta’uk, tenke brani nafatin, tanba uluk ita-nia luta hetan liberdade se la liu husi jornalista sira mak divulga informasaun sai ba mundu internasionál, ema lahatene Timor-Leste nia terus, hanesan mós agora tanba ita sai husi situasaun defísil ida lakohi repete tan.
Deputadu CNRT, Duarte Nunes, husu jornalista sira atu públika informasaun tuir faktu ne’ebé iha terrenu no labele inventa.
Enkuantu, tuir konstituisaun repúblika demokrátika Timor-Leste iha artigu 40 (Liberdade ko’alia no informasaun ninian), iha alinea 1 hateten ema hotu-hotu iha direitu ba liberdade ko’alia nian no direitu atu hetan informasaun ruma, no tan informasaun loloos nian.
Iha konstituisaun artigu 41 (Liberdade imprensa no komunikasaun sosiál ninian) iha alinea 1 hateten iha garantia ba liberdade imprensa nian no ba meiu seluk tan kona-ba komunikasaun sosiál.
Jornalista : Nelson de Sousa
Editór : Cancio Ximenes
