DILI, 05 setembru 2024 (TATOLI) – Asosiaun Jornalista Timor-Leste (AJTL) liuhusi konferénsia imprensa, ohin, iha Fatuhada, husu ba parte relevante hotu atu respeita atividade jornalístika iha terenu no labele ameasa bainhira jornalista halo kobertura iha espasu públiku ne’ebé de’it.
AJTL afirma pozisaun ida-ne’e tanba aktu impedimentu ne’ebé polísia halo hasoru Jornalista Diligente, Antónia Kastono Martins no hadau ekipamentu Jornalista Media One Timor, Suzana Cardoso nu’udar tentativa no ameasa hasoru liberdade imprensa no liberdade espresaun iha Timor-Leste nu’udar haktuir iha Konstituisaun RDTL, Artigu 40 no 41. Aktu husi polísia konsidera mós aktu sensura hasoru ne’ebé jornalista sira rekolle antes publika hodi garante direitu ba asesu informasaun lolos no kredivel.
Nota informative ne’ebé TATOLI asesu katak Asosiasaun husu ba Conselho de Imprensa atu foti inisiativa hodi kontinua halo sosializasaun ba Lei KOMSOS, atu públiku no entidade sira Estadu nian bele komprende papél mídia iha sosiedade demokrátiku.
Husu mós ba SECOMS atu komunika ho aparellu sira Estadu nian hanesan forsa SEATOU, liuliu polísia atu respeita mídia no jornalista nia servisu banhira halo kobertura ba asuntu sosiál sira ne’ebé liga povu baibain sira-nia moris. Jornalista sira no kanál mídia hotu iha rai-laran atu fó salidariade ba malu hodi kontinua publika kazu ne’e to’o hetan solusaun lolos no justu.
Jornalista no kanál mídia hotu atu nafatin kumpre Kódigu Étika Jornalístika, Lei Komunikasaun Sosiál no prinsípiu sira jornalizmu nian bainhira hala’o knaar jornalizmu iha ne’ebé de’it atu nafatin asegura no garante liberdade imprensa no liberdade espresaun iha Timor-Leste.
AJTL husu ba Governu no parte seguransa atu respeita jornalista sira-nia kobertura durante Amu Papa Francisco nia vizita mai Timor-Leste, labele halo diskriminasaun ba media sira no fó espasu ba jornalista sira atu halo sira-nia movimentu atu halo kobertura tuir kada media ángulu ne’ebé hakarak foti, nune’e laiha tentativa atu limite liberdade imprensa iha Timor-Leste, tanba AJTL observa katak loron hirak nia laran ekipa konjuta sira tenta fó limitasaun ba jornalista sira atu asesu Tasi-Tolu hodi foti filmajen ka foto iha fatin refere.
AJTL kontra no kondena aktu detensaun hasoru Jornalista Antónia Kastono Martins no impedimentu hasoru Jornalista Suzana Cardoso husi PNTL eskudra Dom Alexo tanba sei hatauk jornalista no mídia iha tempu sira tuir mai bainhira hala’o sira nia papél kontrolu sosiál iha país demokátiku ne’e.
AJTL konsidera detensaun no impedimentu hasoru jornalista nu’udar aktu represivu ida hodi hatauk jornalista sira bainhira halo sira ninia knaar jornalizmu iha kontestu kobertura no publikasaun notísia.
AJTL mós sei halo karta ba Sua Exelénsia Prezidente Républika, José Ramos Horta nu’udar mós Laureadu Nobel da Paz no Primeru Ministru Xanana Gusmão kona-ba polísia nia aktu hirak ne’e tanba ameasa ona liberdade imprensa no liberdade espresaun iha ámbitu Timor-Leste halo preparasaun atu simu Amu Papa.
AJTL mós sei prosesa kazu ne’e tuir Lei Komunikasaun Sosiál, Artigu 41, nune’e fó efeitu legál hasoru entidade sira ne’ebé tenta hatame liberdade imprensa iha Timor-Leste.
Konstituisaun RDTL
Artigu 40 (Liberdade ko’alia no informasaun ninian )
1. Ema hotu-hotu iha direitu ba liberdade ko’alia nian no direitu atu hetan informasaun ruma, no tan informasaun loloos nian.
2. Liberdade ko’alia no informasaun ninian labele hetan limitasaun hosi sensura ruma.
3. Lei maka sei regula direitu no liberdade ne’ebé temi-sai iha artigu ida-ne’e, ho baze iha imperativu kona-ba respeitu ba Lei-Inan no respeitu ba ema idaidak nia dignidade.
Artigu 41 (Liberdade imprensa no komunikasaun sosiál ninian)
1. Iha garantia ba liberdade imprensa nian no ba meius seluk tan kona-ba komunikasaun sosiál.
2. Halo parte liberdade imprensa nian, liberdade ko’alia nian no hamoris/hakiak jornalista sira, asesu ba fontes kona-ba informasaun, liberdade editoriál, protesaun ba independénsia no ba segredu profisionál no mós direitu atu halo jornál, publikasaun ninian no meius difuzaun selu-seluk tan.
3. Labele permite monopóliu kona-ba meiu komunikasaun sosiál sira.
4. Estadu hametin liberdade no independénsia ba órgaun públiku kona-ba komunikasaun sosiál, husi podér polítiku no podér ekonómiku.
5. Estadu hametin ezisténsia ba servisu públiku ida ba rádiu no televizaun, ne’ebé sente livre, haree mós ba objetivu seluk, hanesan protesaun no divulgasaun kona-ba kultura no tradisaun Repúblika Demokrátika Timór-Leste nian, no fó garantia ba ema ida-idak atu hateten nia hanoin rasik.
6. Estasaun emisora ba radiufuzaun no rádiu televizaun nian bele hala’o de’it ho lisensa tuir lei haruka.
TATOLI
