DILI, 06 setembru 2024 (TATOLI) – Ministériu Saúde (MS) hamutuk ho Ministériu Agrikultura Pekuária, Peska no Floresta,(MAPPF) husu ba komunidade sira ne’ebé mak hakiak animál maibé tenke haree fatin ne’ebé apropriadu, atu bele kria ambiente ne’ebé saudavel iha Timor-Leste.
“Ami apela ba autoridade sira, hanesan xefe suku, xefe aldeia no komunidade sira ne’ebé mak hakiak animál atu toma atensaun no tau didiak ita boot sira-nia animál iha fatin sira ne’ebé mak apropriadu. Nune’e ita bele kria ambiente ne’ebé mak saudavel, seguru iha ita-nia rain”, Ministra Saúde Elia dos Reis Amaral, informa liuhosi konferénsia imprensa iha salaun MS, Caicoli, ohin.
Nia afirma, nesesáriu liu atu haree ba ijiéneno ordem públika, restrisaun ba movimentu animál sira bazeia ba dekertu lei númeru 3/2024 husi 17 janeiru 2024 alterasaun dahuluk ba dekretu lei numeru 33/2008 27 de agostu iha artigu 8 relasiona ho ijiéne no ordem públika.
“Ita haree ba movimentasaun animál la apropriadu, proibidu tebes ba animál sira ne’ebé mak halai ba mai iha dalan públiku no fatin públiku sira seluk tantu animál sira iha na’in no mós la iha na’in”, nia afirma.
Nia esplika, dekretu-lei númeru 12/2014 14 maiu, haree ba restrisaun movimentu animál sira iha artigu 5 katak kontrolu animál sira iha fatin apropriadu no labele husik livre.
“Iha ne’e ita foka ba pontu importante ho dekretu ne’ebé mak ha’u mensiona liu ba, dahuluk relasiona ho kontrola moras animál ne’ebé mak iha ona, posilibidade moras bele transmite ba ema banhira ita kontrolu animal, ita bele halo prevensaun kontaktu animál no ema kontrola moras ne’ebé mak husi animál ba ema sira”, nia esplika.
Nia relata, presiza halo vijilánsia epidemolojia no tékniku veterenáriu bele tau matan ba situasaun ida-ne’e atu bele dezenvolve ba sirkulasuan animál sira ne’ebé mak la apropriadu atu bele kria ambiente ne’ebé mak saudavel no seguru.
Iha fatin hanesan, Ministru Agrikultura Pekuária, Peska no Floresta, Marcos da Cruz, hateten dekretu lei númeru 12 /2014, 14 maiu, Sekretáriu Estadu Pekuaria no Diretór Jerál Pekuaria no Veterenaria no Diretora Nasionál Veterenaria sira la’o ona ba munisípiu sira atu esplika ba populasaun sira kona-ba restrisaun movimentu animál sira iha área urbana.
“Ita haree katak iha ema balun seidauk sulan nia animál, entaun ita presiza halo sosializasaun nafatin nune’e sira bele sulan sira-nia animál iha nia fatin hodi labele atrapalla ema seluk nia movimentasaun”, nia konklui.
Jornalista : Felicidade Ximenes
Editór : Zezito Silva
