JAKARTA, 10 setembru 2024 (TATOLI) – Papa Francisco hato’o obrigadu ua’in ba Povu Indonézia, molok hakotu Misa Aberta iha Estádiu Gelora Bung Karno, ne’ebé nakonu ho sarani Katóliku 80,000-resin.
Antes hakotu Miss Solene ne’e, Santu Padre hato’o ninia agradese ua’in ba Igreza no sarani Katólika Indonézia ba sira-nia fé no fraternidade.
“Hato’o ha’u-nia obrigadu ua’in ba Cardinal Ignatius Suharyo Hardjoatmodjo, ba mós Prezidente Konferénsia Episkopál, ba bispu seluk husi Igreza Katólika Indonézia, ne’ebé mak hamutuk ho padre, diakonu sira kontinua serve povu santu Nai Maromak nian iha nasaun ne’e,” Papa Francisco dehan molok konklui Misa Solene iha Estádiu Gelora Bung Karno, Jakarta, kinta ne’e.
Santu Padre mós agrades feto no mane relijizu, voluntáriu, no liuliu ba idozu no sira ne’ebé moras. “Kontinua reza ba imi”.
“Ha’u-nia viajen mai Indonézia to’o ona nia rohan, no hau hakarak espresa ha’u-nia gratidaun ba buat furak hotu hau simu iha ne’e,” Santu Padre hato’o
Sua Santidade hato’o mós agradese ua’in ba Prezidente Repúblika Indonézia, Joko Widodo, autoridade sívil, no seguransa no liuliu ba Povu Indonézia. “Maun-alin no inan-feton sira, Maromak haraik Bensaun ba imi no halo imi buras hodi nafatin prezerva dame no domin fraternu.”
Entretantu, Prezidente Widodo hafoin simu Santu Padre molok Misa Solene ne’e, nia hateten sarani Katóliku Indonézia kontente tebes ho prezensa Papa Francisco nian.
“Ba Fiar Na’in Katóliku Indonézia tomak, ohin loron ita kontente tebes ho Papa Francisco nia prezensa iha Indonézia,” Widodo hatete liu husi video ne’ebé mak fo sai iha Estádiu Gelora Bung Karno.
Ohin (06/09), Santu Padre sei kontinua nia viajen ba Papua Nova Guiné (PNG), nu’udar nasaun daruak husi ninia vizia ba Asia no Pacífico.
Papa Francisco husik hela Aeroportu Internasional Soekarno Hatta Jakarta iha tuku 9.45 dader oras Jakarta no to’o iha Aeroportu Internasionál Port Moresby Jakson mais ou menus tuku 6.50 lorokraik, oras PNG.
Hafoin to’o iha PNG, Amu Papa sei ba deskansa kedas hodi hala’o ninia vizita iha loron tuirmai.
Tuir ajenda, durante ninia vizita iha PNG, Santu Padre sei vizita Governadór Jenerál, hala’o enkontru ho autoridade, sosiedade sívil, no korpu diplomátiku, vizita Children of Street Ministry and Callan Services, hala’o enkontru ho bispu, padre, diakonu, madre, no seminarista, enkontru ho Primeiru-ministru PNG, James Marape, no prezide misa solene.
Jornalista:Filomeno Martins
Editor: Rafael Ximenes de A. Belo
