Papa Francisco nia simplisidade sai motivasaun ba timoroan sira
BAUCAU, 06 setembru 2024 (TATOLI) – Igreja liuhusi Parókia São José Vila Nova Baucau konsidera Papa Francisco nu’udar pesoál simples lori motivasaun hodi hametin fiar timoroan ba Maromak.
Padre Pároku Parókia São José Vila Nova Baucau, Benediktus Random, hateten, Papa Francisco ema-ne’ebé simples sai modelu moris ne’ebé hatudu ona ba mundu nu’udar fiar-na’in.
Ho simpilisidade, Papa hatudu liuhusi hahalok no mensajen ho liafuan nakonu ho balansu ne’ebé nia manifesta durante lidera Igreja Katólika.
“Papa nia pezensa sei fó motivasaun ba ita hotu, nia espiritualmente ne’e fó motivasaun atu reforsa tán ita-nia fiar,” Padre Pároku São José Vila Nova hateten iha Vila Nova, sesta ne’e.
Vizita Papa Francisco mai Timor-Leste mós lori mensajen ne’ebé bele motiva timoroan hotu atu hametin fiar ba Maromak, tanba Uma Kreda Katólika Timor-Leste iha ona istória kona-ba vizitasaun Amu Papa liuhosi Papa João Paulo II, ne’ebé lori mudansa ba mundu.
Padre Benediktus Random, argumenta, mundu ohin-loron ema hotu haree liuhusi ba materialista hanesan hahalok goza moris no isin-nia, nune’e ho prezensa Papa Francisco sai momentu reflesaun ba timoroan atu fó atensaun mós ba vida espiritúal.
“Papa nia prezensa sei halo boot ema hotu-hotu nia fiar ba Maromak, ne’ebé la’ós moris de’it ho mundu, maibé moris mós ho Maromak,” Padre Benediktus Random akresenta.
Padre Random, husu peregrinu ne’ebé atu partisipa misa solene iha Tasi Tolu Dili, atu prepara aan ho fuan hodi simu bensaun direita husi saseluk Papa Francisco.
Ho vizitasaun Papa Francisco durante loron-tolu sei halo boot uma kreda Katólika iha no haforsa kultura espirituál iha Timor-Leste.
Jornalista : Natalino Belo
Editór : Evaristo Soares Martins
