DILI, 06 Setembru 2024 (TATOLI) – Sekretaria Estadu Floresta (SEF) dezenvolve plantasaun ai-sunu iha Manatuto iha rai ektare 100 atu apoia komunidade sira iha área rurál, informa Sekretáriu Estadu tutela, Fernandino Vieira.
“Husi parte Floresta nian hanoin ona oinsá bele dezenvolve plantasaun ai-sunu, nune’e ita bele apoia komunidade iha área rurál, tanba sira-nia moris dependénsia ba ai-sunu ne’ebé moris naturál ne’e maka’as tebes”, sekretáriu Estadu dehan iha enkontru ne’ebé hala’o iha salaun MAPPF, Comoro, ohin.
Tanba ne’e, SEF hahú dezenvolve ona plantasaun ai-sunu ne’e atu tulun komunidade sira labele tesi ai-arbiru iha ai-laran sira, inklui iha foho-lolon no fatin protejidu sira, nune’e labele hamosu inundasaun iha futuru.
Ho plantasaun ai-sunu ne’ebé SEF dezenvolve iha Manatuto ne’e, bainhira sira utiliza hodi halo negósiu sei fó benefísiu, tanba ai-horis ne’ebé sira uza daudaun ne’e iha rai hamutuk ektare 100 maka sira prepara ona hodi kuda.
Ne’e duni, parte Floresta sei halo esforsu atu hetan fundu, nune’e bele utiliza hodi dezenvolve plantasaun referida atu halo netik muru protesaun atu asegura ai sira ne’e labele bá tesi arbiru, maibé sei utiliza bainhira nesesidade ezije ona.
Nune’e mós, Ministru Agrikultura, Pekuária, Peska no Floresta, Marcos da Cruz, dehan plantasaun ai-sunu ne’ebé parte Floresta hahú dezenvolve ne’e di’ak, maibé nia sujere tenke halo jestaun ida adekuada, nune’e labele hamosu fali dezentendimentu ruma iha futuru. Tanba antes ne’e, ministériu liuhusi SEF fahe ona fugaun ba komunidade sira atu minimiza sunu ai.
Governante ne’e salienta katak ho dezenvolvimentu plantasaun ai-sunu ne’e tenke iha jestaun di’ak hodi bele konvense komunidade iha área rurál bele entende ho programa ne’e no nia husu ba Floresta bainhira programa ne’e iha ona benefísiu tenke halo sosializasaun ba populasaun sira.
Jornalista: Tomé Amado
Editora: Maria Auxiliadora
