Xefe Ezekutivu Xanana entrega ambulánsia 10-resin ba KO
DILI, 06 setembru 2024 (TATOLI) – Primeiru-Ministru Kayrala Xanana Gusmão, entrega kareta ambulánsia multifunsaun 10-resin ba Komisaun Organizadora (KO) atu utiliza iha ámbitu vizita Amu Papa nian iha Timor-Leste.
Primeiru-Ministru agradese bá Organizasaun Mundiál Saúde (OMS), apoia ambulánsia tolu no Governu Japaun, disponibiliza ambulánsia rua no restu hola husi Orsamentu Jerál Estadu.
“Ambulánsia hirak ne’e di’ak, tanba kompleta kedas ho fasilidade médiku nian, tanba ne’e lori Governu nia naran agradese ba Organizasaun Mundiál Saúde no Governu Japaun ne’ebé apoia ita sein husu buat ida”, Xefe Ezekuitvu dehan iha Palásiu Governu, ohin.
Xefe Governu husu bá motorista sira atu kuidadu kareta ambulánsia no fasilidade sira ne’e iha ámbitu vizita Sua Santidade Papa Francisco, hodi fó atendimentu ba sarani sira ne’ebé sei partisipa misa iha Tasi-Tolu. Ambulánsia multifunsan ne’e kompleta kedan ho fasilidade médiku hanesan kama, oksijéniu no seluk-tán.
Xefe Governu entrega ambulánsia ba KO akompañia husi Ministra Saúde, Vise-Ministru Administrasaun Estatál, Sekretáriu Estadu Komunikasaun Sosiál no Diretór Nasionál Ambulánsia no Emerjénsia Médika no ekipa sira seluk.
Iha fatin hanesan, Ministra Saúde Elia dos Reis Amaral, hateten ambulansia 10-resin ne’ebé entrega ba KO ne’e tolu husi OMS no rua husi Governu Japaun.
“Ambulánsia ne’ebé mak ita entrega ne’e hamutuk 10-resin, husi ne’e, ambulánsia tolu apoiu husi Organizasaun Mundiál Saúde, rua husi Governu Japaun no ita sosa Orsamentu Jerál Estadu 2024 hamutuk 10, rua sei iha dalan no ualu mak iha ne’e ona”, Ministra Saúde Elia dos Reis informa.
Nia dehan, ambulánsia ida-ne’e bainhira Papa Fransisco fila, Ministériu Saúde sei apoiu ba munisípiu sira ne’ebé mak menus ambulánsia.
“Tuir nesesidade ba prestasaun servisu, ita garante katak ambulánsia ne’e ita utiliza iha ámbitu Amo Papa vizita, buat hotu sei la’o ho di’ak”, nia konklui.
Jornalista : Felicidade Ximenes
Editór : Zezito Silva
