DILI, 07 setembru 2024 (TATOLI) – Diretór Eskola São Pedro Comoro, Padre, Matias Pinto SDB, dehan Eskola São Pedro Comoro akumula Ministru estraordináriu koru no joven sira husi munisípiu hotu kuaze 2.000 atu ba tuir misa iha loron 10 fulan setembru iha tasi tolu.
“Ministru estraordináriu sira ne’e atu fo komunga ba sarani sira iha ambitu misa tasi tolu koru no joven sira ne’ebe mak atu hasoru amo papa iha katedral kuaze 2.000, entaun aula sira nee’ okupa hotu inklui iha koridor ne’e sira sei toba hotu ,” Matias Pinto SDB, informa ba TATOLI iha Eskola São Pedro Comoro ohin.
Nia hateten problema ne’eb’e eskola refere hasoru mak haris fatin tanba ema barak entaun la bele garante.
“Ami-nia problema mak haris fatin ladún garante ba ema sira ne’e atu utiliza, tanba ema sira ne’e husi munisípiu hotu mai, hanesan ministru estraordináriu, koru no joven sira, maibé ami buka meiu oinsá sira bele utiliza hotu, tanba ema sira ne’e laos ida-ne’e de’it, maibé sei iha dalan tan, bainhira sira mai, ami haruka ba fatin Dom Bosco nian atu toba iha ne’eba, maibé atu han sira mai han iha ne’e”, nia relata.
Iha fatin hanesan, Ministru Estraordináriu husi Paroquia Letefoho, Nomio Guterres Soares, informa iha Eskola São Pedro fatin di’ak atu bele deskansa, nune’e iha loron 10 fulan-Setembru atu ba tuir misa iha Tasi-Tolu.
“Ami atu sai ministru estraordináriu ne’e, ami hahú tuir formasaun iha ami-nia Paroquia Letefoho kona-ba oinsá ami atu sai ministru estraordináriu atu fó komunga ba sarani sira iha tempu vizita Papa Fransisco nian, tanba tempu limitadu ona ami tuir formasaun loron ida-ne’e natoon ona mai ami”, Nomio esplika.
Ministra Estraordinária husi Paroquia Luro Munisípiu Lautem, Madalena Ximenes kontente tanba ho idade ne’ebé mak kiik maibé fó fiar atu fó komunga ba sarani sira iha ámbitu misa Amu Papa nian iha Tasi-Tolu.
‘’Hau idade foin 23, ema bele fó fiar ha’u no hili ha’u bele sai ministra estraordináriu atu fó komunga ba sarani sira iha Tasi-Tolu, antes ne’e ami tuir ona formasaun oinsá fó komunga ba sarani sira”, nia haktuir.
Joranlsita : Felicidade Ximenes
Editór : Zezito Silva
