Governu prepara ona fatin ba peregrinu 6.024 husi Viqueque iha Hera
Dili, 06 setembru 2024 (TATOLI)-Ministru Agrikultura Peskas, Pekuária no Floresta (MAPPF), Marcos da Cruz hamutuk ho Prezidente Autoridade Munisípiu (PAM) Viqueque, sesta kalan ne’e, observa fatin akampamentu ba peregrinu sira husi munisípiu Viqueque ne’ebé Governu prepara ona iha aldeia Mota Ki’ik, suku Hera, postu Cristu Rei, munisípiu Dili.
Tuir Prezidente Komiasaun organizadora vizita Sua Santidade Papa Francisco nivél munisípiu Viqueque atuál PAM Viqueque, Francisco Cruz S. de Gonzaga Soares, hateten, ekipa komisaun munisípiu Viqueque hahú halo observasaun horiseik no agora hodi haree direta fatin ne’ebé Governu sentrál prepara ne’e sufisenta ba peregrinu sira husi munisípiu Viqueque.
“Ohin ami kontinua mai haree fatin ba ita-nia peregrinu sira husi Viqueque. Ha’u sente fatin ida-ne’e sufisiente ba peregrinu sira husi Viqueque ho totál na’in 6.024”, Francisco Cruz S. de Gonzaga Soares, ba Jornalista Agência Tatoli, iha aldeia Mota Ki’ik, suku Hera, ohin.
PAM Viqueque ne’e afirma, fatin ne’ebé Governu prepara koresponde ba númeru peregrinu ne’ebé rejista iha komisaun munisípiu Viqueque.
Kona-ba fasilidade nia dehan, iha fatin akapamentu kompleta ho sanitária públiku kompostu husi haris fatin, sintina hamutuk 120 ba feto unidade 60 no ba mane unidade 60, uma ba peregrinu deskansa 200 no tenda unidade 35 no kompleta bee-moos ba peregrinu sira.
“Ba preparasaun ne’e sufisiente tanba ita la’ós mai piknik, maibé ita mai halo peregrinasaun. Ne’ebé peregrinu sira husi Viqueque hahú loron 9 mai ona iha fatin akampamentu ne’ebé Governu prepara”, nia relata.
Iha fatin hanesan, MAPPF Marcos da Cruz, dehan nia parte kontinua koordena ho funsionáriu sira husi MAPPF kona-ba preparasaun ai-han ba peregrinu sira husi munisípiu Viqueque, durante hela iha fatin akampamentu Hera.
“Ita-nia preparasaun ba ai-han sufisente ba peregrinu sira durante hela iha akampamentu mak hanesan han matabixu meudia no kalan to’o peregrinu sira fila”, governante ne’e kompromete.
Tuir observasaun jornalista Agência Tatoli iha fatin akampamentu Hera nota Governu instala ona fasilidade sira hanesan fatin deskansa, sanitária, eletrisidade no bee-moos.
Tuir dadús husi komisaun nivél munisípiu Viqueque totál peregrinu na’in-6.024 kompostu husi feto na’in-3.142 no mane na’in-2.882, ne’ebé komisaun sei prepara transporte unidade 201.
Jornalista : Vitorino Lopes da Costa
Editór : Florencio Miranda Ximenes
