DILI, 08 setembru 2024 (TATOLI)-Konselu Nasionál Islamiku Timor-Leste no Fundasaun Annur sei organiza komunidade, joven Musulmanu no estudante Sekundária Annur, uza uniforme atu hamriik iha dalan-ninin hodi simu prezensa Sua Santidade Papa Francisco ne’ebé tuir ajenda sei to’o iha Timor-Leste aban, segunda loron (09/09/2024) tuku 14:10.
Asuntu ne’e relata husi Vise-Prezidente Konsellu Nasionál Islamiku Timor-Leste, Abdulah Inácio António Soares, durante partisipa iha programa TATOLI atuál ba vizita sua Santidade Papa Fransisco iha Timor-Leste, ne’ebé realiza iha Sentru ba Mídia (MC, sigla inglés) iha Ministériu Transporte no Telekomunikasaun, domingu ne’e.
Abdulah apela ba komunidade Musulmanu atu entusiazmu hamriik ho haksolok hodi simu líder masimu Katólika Mundiál ne’e, tanba nia prezensa iha Timor-Leste la’ós de’it ba komunidade fiar katóliku nia, maibé ba mós komunidade husi relijiaun sira seluk.
Notísia relevante: Papa Fransisco husu Kardeál foun sai roman ba sarani tomak Maromak nian
“Ita presiza estuda barak, aprende oinsá ita moris hanesan ema umanu, presiza moris hamutuk, respeitu-malu, ita tulun-malu, ita-nia amu Papa no liurai Arabia sai hanesan inspiradór ba ita, katak ita moris iha mundu presiza moris simples, hadomi ema hotu, la haree ba rasa, relijiaun ni kultura, maibé ita hotu-hotu jerasaun husi Adaub ho Eva,” nia katak.
Abdulah senti kontente no orgulu tanba vizita ne’e hanesan asaun reál ida depois Papa Fransisco ho liurai Arabia iha 2019 hato’o pensamentu atu dezenvolve fraternidade imana iha mundu tomak.
“Realidade dia 09 aban ita-nia Amu papa sei to’o ita-nia rai, antes ne’e ita simu dokumentu fraternidade umana, ami servisu hamutuk ho lideransa hotu-hotu ne’ebé ke servisu iha ita-nia país, ami estabelese ona asosiasaun turizmu relijiozu ne’ebé ke prezidente rasik Padre Ángelo Salsinha, atan ha’u rasik hanesan przidente konsellu fiskál, ami mos hakarak dezenvolve nafatin ba fraternidade umana ba ita-nia povu tomak,” nia hateten.
Nia observa fraternidade umana durante ne’e moris tebes iha sosiedade Timor-Leste, tanba ne’e Musulmanu rekoñese Papa Fransico nu’udar mestri ida-ne’ebé hanorin ema hotu atu hadomi malu, la haree ba rasa, étnika, kultura no relijiaun.
“Ema hotu-hotu moris iha planeta mundu ne’e presiza hakuak mós, hadomi mós no estabelese nafatin paz iha mundu,” Vise Prezidete Islámiku TL ne’e akresenta.
Kona-bá komunidade Musulamanu atu enkontru ho Papa Francissco iha Palásiu Prezidensiál, Abdulah dehan, to’o agora parte Konselu Nasionál Islamiku Timor-Leste no Fundasaun Annir seidauk simu konvite formál ruma husi komisaun organizadora.
Abdulah dehan, bainhira hetan konvite Musulmanu sei delega joven ida ka rua ba partisipa hodi hato’o mensajen ba Papa Francisco liga ho dokumentu fraternidade umana.
“Se ami hetan konvite, atan ha’u rasik apresia tebes hakarak marka prezensa mos iha eventu ida-ne’e, ha’u-nia hanoin katak karik iha posiblidade ha’u sei tuur hamutuk ka hola bensa, rei Amu Papa nia liman,” nia akresenta.
Konselu Nasionál Islamiku TL mós simu informasaun husi Fundasaun Annur katak atu prepara joven Musulmanu na’in-10 atu partisipa enkontru ho Papa Francisco iha Sentru Komvensaun Dili (CCD, sigla portugés), maibé to’o agora seidauk hetan karta formál ruma.
Nia espera ho vizita Papa Francisco ne’e bele haburas liután fraternidade umana no toleránsia iha Timor-Leste.
“Ita mesak timoroan, ita diferente husi parte relijiaun, maibé ita mesak povu sosiedade iha Timor-Leste, presiza ita banati tuir, haburas nafatin fraternidade humana ne’ebé ke estabelese ona husi ita-nia lideransa Musulmanu liurai Arabi ho Amu Papa,” nia hateten.
Notísia relevante: Monseñor Marco Sprizzi louva Estadu TL nia-preparasaun simu Papa Francisco
Jornalista: Sérgio da Cruz
Editór: Evaristo Soares Martins
