Ba sarani Papua, Papa Francisco husu labele fiar poder matan-dook no buan
PAPUA NOVA GUINÉ, 08 setembru 2024 (TATOLI) – Papa Francisco husu sarani Katóliku Papua Nova Guiné (PNG) atu labele fiar ezisténsia poder matan-dook no buan no husu sarani nakloke aan ba Nai Maromak nia evanjellu atu bele moris iha grasa no domin Nai Maromak nian.
Santu Padre hato’o lia hirak ne’e iha ninia omília durante Misa Aberta ba sarani hamutuk 35,000-resin iha Estadiu John Guise, Port Moresby, domingu ne’e.
Papa Francisco hato’o lia hirak ne’e tanba konsidera PNG nu’udar nasaun ne’ebé mak sei fiar maka’as ba poder matan-dook no buan.
Tuir estimasaun husi relatóriu UN fó sai katak kada tinan ema 200-resin mak mate tanba dunmatak diabu, enkuantu ativista lokál relata katak kada tinan vítima 50,000-resin mak husik hela sira-nia uma tanba, komunidade no viziñu duun sira buan.
Papa Francisco dehan, PNG nu’udar nasaun ne’ebé dook husi nasaun barak no dook husi Nai Maromak nia prezensa, “ida-ne’e halo imi labele komunika ho Nai Maromak, maibé ohin, Nai Maromak hakarak hakbesik an bai imi … atu imi hatene katak imi iha nia fuan no imi hotu importante ba nia.”
“Nai hakarak hanorin imi idak-idak ho nia evanjellu, tanba ne’e loke imi aan ba Maromak,” Papa Francisco hato’o lia-hirak ne’e iha ninia omília durante misa aberta, iha Estadiu John Guise, Port Moresby, ohin.
Papa hato’o ba sarani sira katak, loke fuan ba Maromak no loke laran ba Evanjellu importante tebes hodi hadook aan husi manobra matan-dook hodi fiar katak poder buan nian iha hodi hasusar no hakotu ema seluk nia vida. “Mai ita hatete lae ba buat sira ne’e hotu tanba mesak bosok no hata’uk ita! Entaun, mai loke ita laran ba Maromak, ba Nia Liafuan, ba nia Evanjellu no ba Igreja,” Papa Francisco dehan.
Iha ninia diskursu, Kardeál John Ribat hatete katak viajen Santu Padre mai PNG nu’udar biban di’ak ida ba sarani Katóliku atu hametin liután sira fiar. “Papa nia Viajen ne’e lori bensaun, pás, korajen no hakle’an ita-nia fiar.”
“Ita agradese tebes ba selebrasaun eukaristia ida-ne’e. Selebrasaun misa eukaristia ne’e halibur ita hotu hamutuk iha Igreza Roma. Obrigadu uain ba vizita maravilloza ne’ebé nakonu ho Nai Maromak nia Grasa,” Cardeal Ribat dehan.
Misa Solene ne’e hahú mais ou menus tuku 7.45 oras PNG, iha ne’ebé Papa Francisco sama ain iha Altar Santu, simu ho hakilar lian-makas no hananu dehan, “Bem Vindu Papa Francisco.”
Iha dalan ba altar, Papa Francisco no kardeál sira akompaña ho dansa no kanta tradisionál. Enkuantu, dansariñus sira enfeita sira-nia an ho hatais tradisionál ho kor oioin hanesan kinur, mean, metan no mutin hodi reprezenta bandeira PNG.
Hafoin misa hotu, Santu Padre arranka kedas ba Vanimo, kapitál husi Provinsia Sandaun PNG nian iha parte norte hodi vizita komunidade relijioza no sarani sira fatin refere.
Tuir ajenda, Segunda (08/09), Papa Francisco sei arranka ba Timor-Leste nu’udar nasaun datoluk husi ninia vizita ba ASEAN no Pasífiku.
Journalist: Filomeno Martins
Editor: Rafael Ximenes de A. Belo
