DILI, 08 setembru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL) Tenente Jenerál Domingos Falur Rate Laek, akompaña husi Komandante Jerál PNTL, Komisáriu Jerál Polísia Henrique da Costa, ofisiál F-DTL no PNTL inklui ekipa forsa tarefa konjunta halo inspesaun ikus ba fatin sira ne’ebé mak Papa Francisco sei hala’o vizita durante loron tolu, hahú husi 9 to’o 11 setembru.
Inspesaun akontese iha Portu Dili, hodi haree besik liután ekipa konjunta forsa tarefa ne’ebé koloka iha área refere oinsá atu halo vijilánsia iha área marítima nian durante vizita Papa iha Timor-Leste.
Komandu PNTL no F-FDTL halo mós inspensaun ba ekipa konjunta sira ne’ebé kolokadu iha Farol, besik rezidénsia nunsiatura ho nune’e komandu F-FDTL no PNTL fó orientasaun ba membru sira atu asegura fatin ne’e ho di’ak, tanba durante vizita Papa Francisco iha Timor-Leste sei hela iha Nunsiatura.
Aleinde ne’e, komandu rua halo mós inspensaun ba forsa konjunta sira ne’ebé destaka iha Aeroportu Internasionál Nicolau Lobato Comoro hodi haree preparativu forsa konjumta ne’ebé destaka iha área refere, nunee fó seguransa másimu ba Amu Papa ho nia delegasaun bainhira tún husi aviaun.
Komandu rua halo mós inspesaun ikus ba forsa tarrefa konjunta ne’ebé koloka iha area Tasi-Tolu ne’ebé Amu Papa sei halo misa.
Ikus liu, Komandu F-FDTL no PNTL halo mós inspensaun ba Sentru Konvesaun Dili (CCD, sigla portugés) no fatin Madre Alma Praia dos Cuqueiros Dili tanba fatin sira ne’e mós Amo Papa sei halo nia vizita durante estadia Timor-Leste.
Xefe Estadu Maiór Jenerál FALINTIL-Forsa Defeza Timor-Leste (F-FDTL) Tenente Jenerál Domingos Falur Rate Laek, hateten operasaun vizita Papa ne’e la’os operasaun ka seguransa baibain, ida-ne’e operasaun ne’ebé bo’ot no misaun todan, tanba ne’e halo servisu ho rigór no Komandu F-FDTL no PNTL husu atu hotu tulun malu, koopera malu hodi fó susesu ba vizita ida ne’e.
“Ohin ha’u ho Koamdante Jerál PNTL mai iha ne’e tanba misaun importante ida. misaun ida agora imi halo ne’e misaun todan, tanba ne’e ha’u aviza ba imi tenke rigorozu, labele hamnasa, imi tenke apoia malu. Imi tenke iha espiritu responsablidade hodi fó susesu ba vizita importante ida-ne’e”, Tenente Jenerál Falur Rate Laek, iha nia intervesaun bainhira halo inspensaun ba ekipa konjunta forsa tarefa ne’ebé kolokadu besik rezidénsia Nunciatura Farol, domingo, ohin.
Falur hateten, F-FDTL no PNTL ne’e diferente iha uniforme de’it maibé misaun ne’e ida de’it.
“Imi bele hatais faru kór ketak ketak, imi iha idaidak nia dutrina, mas imi-nia misaun ne’e ida de’it liman karuk no liman los Estadu nian”, nia adianta.
Nia hateten, vizita ida-ne’e importante tebes iha istória Timor-Leste tanba ne’e ejize forsa rua nia hamutuk atu asegura vizita ne’e hodi lao di’ak, tanba ne’e responsablidade ida-ne’e iha F-FDTL no PNTL nia kabas.
“Ida-ne’e primeira vez mak ita halo operasaun ne’ebé bo’ot liu no estratéjiku, operasaun sira ita halo ona, maibé la bo’ot hanesan ne’e, tanba ne’e ha’u husi membru F-FDTL no PNTL imi tenke laran moos ba malu, neon moos ba malu nune’e ita bele hetan susesu”, nia afirma.
Nia husu ba F-FDTL no PNTL tenke koordena no koopera ba malu, buat ne’ebé presiza koalia sai tenke koalia sai, labele tau iha laran, kuandu hetan buat ruma tenke atua kedan hodi nune’e fó susesu ba seguransa ba vizita Papa.
Tenente Jenerál F-FDTL ne’e husu ba ekipa forsa tarefa katak bainhira deskonfia ema ruma halo asaun, tenke atua ho profisionál, hodi informa ba komandante hodi foti desizaun, labele halo atuasaun arbiru bainhira seidauk hetan orientasaun husi superiór sira.
Jornalista:Natalino Costa
Editór : Zezito Silva
