Membru koru 1.200 hala’o ensaiu ikus iha Tasi-Tolu
DILI, 08 setembru 2024 (TATOLI)–Membru koru husi dioseze Baucau, Dili no Maliana hamutuk 1.200 hala’o ensaiu ba dala ikus nian iha Tasi-Tolu, hodi prepara ba selebrasaun misa solene ne’ebé Prezid husi Amu Papa Francisco iha 10 setembru 2024, iha tuku 16h30 lorokraik.
Notísia Relevante: Membru koru 1.100 husi dioseze tolu sei realiza ensaiu ikus iha 08-10 setembru
“Númeru membru koru uluk ne’e iha 1.100 maibé agora mud aba 1.200. Ohin, itá halibur ona koru sira husi dioseze tolu hodi koko no haree sira nia fatin. Ensaiu hamutuk mós ho eskola orkestra sira iha Timor-Leste,” Pe. Casimiro Pinto OFM hateten ba Agência Tatoli, iha Tasi-Tolu, sábadu ne’e.
Nia hateten, grupu orkestra ne’ebé toka akompaña iha misa solene ne’e mai husi grupu Berliku Lian, Safrei eskola, eskola múzika padre Adérito Victor da Costa nian husi Baucau no seluk tan.
Aleinde orkestra ne’e, nia hateten, iha organista ne’ebé toma mak Mito Freitas maibé pianista ne’e naran Mariska ne’ebé mai husi relijiaun Protestante.
“Nia hakarak kontribui, maibé ita mós presiza ema espesialista mak toka,” nia hateten.
Nia esplika, knananuk ba misa solene ne’e hamutuk 10 mak múzika entrada to’o múzika final. Maibé múzika entrada ne’e ho ninia introdusaun ho inztrumentu instrumentu kulturál hanesan uza dadili no babadok hi rítmu tebe-tebe foti husi Manufahi nian.
Hafoin kanta múzika finál no bainhira amu Papa Feancisco la’o vizita haleu no fó bensaun ba sarani Timor-Leste, artista timoroan Alberto Pedade “Bepi” ho Maria Vitória “Marvi” mak sei hananu múzika rua hanesan The Prayer no Jesus Christ hodi hananu akompãna Papa Francisco nia hakat.
Pianista husi igreja protestante Mariska hateten, sente kontente hamutuk ho koru labarik sira eskola orkestra hodi hahí Maromak iha misa solene ne’ebé sei prezide husi Papa Francisco iha Tasi-Tolu, iha tuku 16h30 lorokraik.
“Objetivu mak atu hahi Maromak, entaun ho vizita amu Papa nian ne’e ita bele hamutuk hahí Maromak liuhusi múzika sira-ne’e,” pianista ne’e hateten.
Mariska dehan, ensaiu ho koru no banda múzika ho instrumentu oioin ne’e la fasil, maibé ho tempu bele ajusta no bele haree sai furak.
“Ho ita-nia uniaun fuan nian, liuhusi múzika ita hahi Na’i Maromak nia naran,” nia dehan.
Pianista ne’e espera, vizita amu Papa nian sei reforsa fiar no orasaun sarani sira-nian no iha unidade igreja hotu-hotu no toleránsia fiar idaidak nian.
Jornalista : Jesuína Xavier
Editór : Cancio Ximenes
