DILI, 08 setembru 2024 (TATOLI) — Sentru klínika iha Aeroportu Internasionál Nicolau Lobato Dili prepara ona atu atende pasiente sira iha ámbitu vizita Papa Francisco iha Timor- Leste.
Tuir observasaun husi Ajénsia TATOLI nian iha Aerportu katak sentru klínika aeroportu, atualmente, preparadu atu atende pasiente sira bainhra mai simu Papa Francisco iha loron 09 fulan-Setembru.
Sentru klínika ne’e iha ona medikamentu kompletu atu atende pasiente sira bainhira moras, husi medikamentu sira ne’e mak hanesan oksijéniu, soru, mákina fuan nian no seluk tan, aleinde ne’e iha mós kama tolu kompletu ho fasilidade emerjénsia nian.
Objetivu husi preparativu ba fasilidade hirak ne’e mak bainhira sarani sira ne’ebé mak mai hein Papa Francisco iha aeroportu mak iha moras ruma, sentru klínika mak atende uluk, karik la di’ak mak halo transferénsia ba Hospitál Nasionál Guido Valadares (HNGV).
Iha sentru klínika ne’e iha ambulánsia ida mak apoiu bainhira iha kazu ruma.
Iha sentru klinikál refere, profisionál saúde hamutuk 15, husi ne’e espesialista fuan nian, nain ida no espesialista interna ida inklui apoiu médiku no enfermeiru sira.
Jornalista : Felicidade Ximenes
Editór : Zezito Silva
