Tékniku ADN ida hetan baku husi ekipa konjunta forsa tarefa
DILI, 08 setembru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL) Tenente Jenerál Domingos Falur Rate Laek, simu relatóriu husi ekipa konjunta forsa tarefa, katak membru husi ekipa ne’ebé kolokadu iha área Tasi-Tolu halo agresaun fízika hasoru tékniku Ajénsia Dezenvolvimentu Nasionál (ADN) bainhira atu ba monta ár kondisionáriu iha fatin misa Tasi-Tolu.
Kazu ne’e akontese iha sábadu (7/9) tuku 21:00, bainhira tékniku husi ADN ba monta AC iha Tasi-Tolu fatin misa nian, maibé antes ne’e, tuir informasaun katak ADN haruka téniku maibé la konsege informa ba komandante tátiku ekipa konjunta forsa tarefa. sidadaun ne’e tama de’it ba área proibidu, maibé nia kontinua tama no ekipa konjunta seguransa ne’ebé halo seguransa iha fatin ne’e halo kedan asaun.
Tenente Jenerál Domingos Falur Rate Laek, konsidera asaun ne’e akontese tiha tanba miss communication.
“Ha’u horikalan simu informasaun ida husi Komandante tátika ba ekipa konjunta forsa tarefa katak membru husi forsa tarefa baku ita-nia sidadaun ida, nia ne’e tékniku husi AND atu ba monta AC iha Tasi-Tolu. Tanba kazu ne’e akontese husi prosesu ne’e ba oin maibé ha’u husu ba imi labele repete tán hahalok ida-ne’e”, Tenente Jenerál Falur Rate Laek, iha nia intervesaun bainhira halo inspensaun ba ekipa konjunta forsa tarefa ne’ebé kolokadu besik rezidénsia Nunsiatura Farol, domingo, ohin.
Nia dehan, problema ne’e mosu tanba dala ruma ADN mak la fó informasaun ba Komandante tátika forsa tarefa.
Falur husu ba membru forsa sira no polísia sira ne’ebé destaka iha Tasi-Tolu hodi fó seguransa ba fatin misa nian, kuandu identifika ema ruma tama área ne’ebé la autoriza, ida-ne’e papél seguransa nia mak atu asegura de’it.
“Imi kuandu haree ema ruma mak momentu iha área ne’ebá, asegura bolu nia didi’ak ho husu nune’e, imi entrega ba komandante forsa tarefa konjunta, imi labele halo asaun bainhira laiha orientasau ruma”, nia konklui.
Jornalista:Natalino Costa
Editór : Zezito Silva
