DILI, 09 Setembru 2024 (TATOLI) – Air Niugini, iha nia istória viajen sasemok nian, sei aterra dahuluk iha Timor-Leste ho viajen apostólika Papa Francisco husi Papua Nova-Guiné mai Dili ho aviaun ne’e.
Boeing 737 sai husi Aeroportu Internasionál Jacksons Port Moresby iha tuku 11 ho balun otl no semo durante oras tolu liu minutu 30 hafoin to’o aeroportu Dili iha tuku 14h10.
Aviaun komersiál ne’e transporta uluk ona Papa João Paulo II iha 1984 husi Mt. Hagen bá Honiara, no iha 1995 husi Port Moresby bá Sydney.
Papa nia viajen apostólika durante loron 12, hahú iha loron 02 to’o 13 Setembru. Husi nia viajen dahuluk ne’e ho aviaun komersiál ITA Airways, empreza aérea nasionál Itália nian. Aviaun ho marka ITA A330 ne’e tula Papa no to’o iha aeroportu Soekarno Hatta, Indonézia, iha loron 03.
Depois vizita tiha Indonézia durante loron 03 to’o 06, Papa kontinua nia viajen bá Papua Nova-Guiné ho aviaun Garuda Indonesia ho númeru vou GA-7780.
Hafoin vizita pastorál entre loron 06 to’o 09 Setembru, ohin, Papa Francisco semo ona mai Timor-Leste ho Niugini Air. Depoizde loron tolu iha país, husi 09 to’o 11 Setembru, Papa sei kontinua nia viajen bá Singapura no tuir planu sei sa’e aviaun Aero Dili.
TATOLI
