PORT MORESBY, 09 setembru 2024 (TATOLI) – Papa Francisco hakotu ninia vizita loron tolu iha kapitál Papua Nova Guiné (PNG), Port Moresby, hodi konitnua viajen apostólika ba Timor-Leste.
Papa Francisco ho ninia delegasaun arranka ho Air Niugini husi Aeroportu Internasionál Port Moresby mais ou menus tuku 11.40 oras PNG no sei to’o iha Aeroportu Internasionál Prezidente Nicolau Lobato mais ou menus tuku 2.10 loro kraik.
Papa Francisco ho nia delegasaun, inklui jornalista na’in-85, sei simu ho seremónia Bem-Vindas iha Aeroportu Internasionál Prezidente Nicolau Lobato, antes hakat ba Apostólika Nunsiatura Vaticano iha Timor-Leste.
Tuir ajenda, iha loron dahuluk husi Santu Padre nia vizita iha Timor-Leste, nia sei partisipa iha serimónia ofisial Bem Vindas iha Palásiu Prezidensiál Nicolau Lobato, tuku 6.00 lorokraik.
Hafoin seremónia refereida, Santu Padre sei halo vizita kortezia ba Prezidente Repúblika, José Ramos Horta, iha tuku 6.30 lorokarik.
Iha fatin hanesan, Santu Padre mós sei hala’o enkontru ho autoridade (membru governu), reprezentante sosiedade sívil, korpu diplomátiku no seluktan.
Enkuantu iha loron tuirmai, Papa Francisco sei vizita Eskola Irmã ALMA, nune’e mós hasoru malu ho bispu, padre, madre, diakónu, relijiozu, seminarista no katekista sira. Iha loron hanesan, Santu Padre mós sei halo enkontru privadu ida ho komunidade Jezuita.
Tuir oráriu, Misa Solene ne’ebé mak sei hala’o iha Tasi-Tolu Dili, sei hahu tuku 4.30 lorokraik oras Timor-Leste.
Iha loron ikus husi Santu Padre nia vizita, nia sei hala’o enkontru ho joven sira iha Sentru Konvesaun Dili (CCD) antes kontinua ninia vizita ba Singapore.
Papa Francisco nu’udar Amu Papa segundu ne’ebé mak hala’o viajen apostólika ba Timor-Leste. Enkuantu, Amu Papa Primeiru ne’ebé vizita uluk Timor-Leste (Timor-Timur) mak Santu João Paulo II, iha loron 12 outubru 198.
Sarani Katólika husi munisípiu 12, inklui RAEOA hatudu entusiazmu boot hodi hein atu simu vizita Papa Francisco iha Timor-Leste.
Journalist: Filomeno Martins
Editór: Rafael Ximenes de A. Belo
