DILI, 09 setembru 2024 (TATOLI)–Iha segunda (09 setembru 2024), hahú tuku 07h00 dadeersan, ho karreta mini ida, sai husi uma Bedois, Camea, dolar neineik suli tuir dalan husi Terminal Becora, atu hakat ba edifísiu Agência TATOLI iha Faról-Dili.
Tuir dalan naruk, nani tuir dalan Becora nian, ha’u haree rai no estrada hanesan na’in laek. Rai hakmatek be hakmatek. Ha’u hateke ba dalan ninin, iha sarani balun be hatais kamizola ho imajen Papa Francisco nian, leba plastiku iha liman loos no bee Aqua botil ida iha liman karuk, la’o ho ansi. Karik, tanba transporte públiku la la’o, sira deside la’o ain atu ba simu Papa Francisco iha Aeroportu Prezidente Nicolau Lobato, Comoro.
La’o uitoan to’o mai iha igreja Sagradu Kurasaun de Jesus Becora nia oin, sarani lubun ida foin nadodon sai misa. Iha sarani hirak ne’e nia leet, iha sarani lubun ida, ferik eh katuas no ho nia oan sira, balun lori pasta, balun lori sumbriña iha liman, balun lori buka hodi la’o ain no la’o ansi. Lahetene! Sira atu ba ne’ebé, maibé sira hakrruk la’o tuir dalan naruk ne’e ho hakmatek.
Iha parte Kuluhun nian, ha’u haree Estrada mamuk be mamuk. Loja sira iha área ne’e nia odamatan sei taka metin, Karik, lahatene, tanba sei dadeer san liu ka tanba taka duni iha lron ida ohin nian.
Tuir dalan liuhusi Biadau to’o mai área Parlamentu Nasionál nian, só haree hetan de’it karreta no motor privadu balun mak halai ba-mai. Iha karreta no motorizada ida-rua mak halai netik. Iha ema la’o ain balun mak sei la’o ba-mai. Karik, iha Bidau, ema lubun sei la’o hasoru malu hodi ba vizita família sira-ne’ebé moras no baixa hela iha Hospitäl Nasionál Guido Valadares (HNGV).
Liuhusi dalan parte tribunál Distritál Dili to’o iha Paláiu Prezidensiál Nicolau Lobato, Bairru Pite nia oin, ha’u haree membru polísia tranzitu balun foin book-aan la’o ba mai. Tuir dalan naruk ne’e, arku sira be reprezenta kada munsípiu hatuur ho nabilan. Imajina fali, Dili be nabilan sai hikas palásiu tradisonál ida be hein atu simu Santu Padre Papa Francisco ho domin be nakonu.
Dalan husi Palásiu Prezidensiál Bairru Pite to’o iha rotunda Prezdente Nicolau Lobato Comoro, arku no armida ho modelu oioin orna dalan-ninin ne’e, halo sidade Dili be baibain nakonu ho karreta no motor, sai hikas sidade hakmatek be anju no santu sira-nia horik fatin. Dili hakmatek. Dili sai sidade dame.
Iha odamatan boot atu tama ba Aeroportu Internasionál Prezidente Nicolau Lobato, Comoro, dalan tama ba aerportu ne’e taka tiha ho besi barrikade metin be metin. Iha seguransa, membru Polísia Nasionál Timor-Leste (PNTL) no Falintil-Forsa Defeza Timor-Leste (PNTL) hamrrik hodi hein odamatan ne’e. Até, to’o funsionáriu aerportu sira atu tama ba laran mós, seguransa sira sei husu no haree sira-nia kartaun identidade. Segurans ametin.
Ohin, iha kaiptál Dili, haree ba-mai, iha Estrada sorin-sorin ne’e, Dili sai hanesan sidade dame. Iha didin lolon no uma leet sira-ne’e, ita só haree-hetan de’it mak figura Papa Francisco nia be pinta no prega metin iha banner nia lolon no balun pinta ho liman iha hena mutin nia leten be kesi metin iha parede ida-nia leet.
Iha rotunda Prezidente Nicolau Lobato, arku no armida ne’ebé munisípu Aileu harii ne’e, reprezenta rai Aileu nia tradisaun ho hatuur kadeira AI-LEUN be halo husi ai-hali nia abut ne’e, hatuur nabilan hodi simu Papa Francisco.
Ho kreatividade, Aileu-oan sira-nian halo arku sira-ne’e halo husi materiál plantasun husi natureza ida-nia kmanek. Karik, sira dezeña konseitu halo arku no harii armida ne’e bazeia ba dokumentu ne’ebé Papa Francisco rasik hakerek mak “LAO DATO SI”. Hadomi Timor-Leste no hadomi natureza, hodi fó Bem-Vindu Papa Francisco mai Timor-Leste.
La’o tuir dalan naruk. Husi rotunda Comor to’o mai Faról-Dili, iha karreta no motor ida-rua mak halai sees ba malu. Iha ponte kiik-oan iha entre GMNTV no Palásiu Prezidente nia klaran, iha membru polísia tranzitu lubun ida hamriik la’o ba-mai. Sira hamriik hamtuuk hodi rona orientasaun atu hala’o sira-nia atividade hodi tau-matan ba dalan hirak ne’ebé loke hela no dalan ida-ne’bé taka ba públiku atu liu.
Sarani balun hatuur ona kdeira hein Papa Francisco
Maske, tuir oráriu, Papa Francisco husi Papua Nova Guine sei to’o iha Timor-Leste iha tuku 14h10 lorokraik iha Aeroportu Dili, maibé iha sarani ka populasaun balun hahú ona buka fatin hodi hatuur kadeira iha dalan sira-ne’ebé Papa Francisco atu liu.
Iha dalan husi Mandarin tuun mai tasi-ibun iha edifísiu Ministériu Turizmu iha Faról-Dili nian ne’e, komunidade Faról balun hatuur ona sira-nia kadeira besik besi barrikade sira iha dalan ne’e, atu tuur hodi hein Papa Francisco liu iha dalan ne’e ba deskansa nunsiatura Motael-Dili.
“Ami tau netik kadeira iha ne’e, para ema labele okupa ami-nia fatin. Ami hakarak haree Papa Francisco ho matan no haree besik, entaun ami tenke tau kadeira iha fatin ne’e,” inan-feton ida ho nia oan sira hatan rame-rame ba Agência TATOLI ho lian ida, iha Avenida Direitos Humanos Faról, segunda ne’e.
Haree husi dalan naruk iha Faról ne’e, iha feto-kolan no mane-klasan ida-ne’e hatais hela kamizola ho figura Papa Francissco nian tuur iha besi barrikade ne’e hun mesa-mesak. Ema la’o ba-mai mós sira la liga rai. Tanbsá mak foin dadeersan hela, sira hein ona Santu Padre se Papa Francisco sei to’o iha Timor-Leste ne’e iha orsida lorokraik.
Bem-Vindu Vigáriu Kristu Nian, Bem-Vindu ba Santu Pedro nia saseluk. Bem-Vindu ba Papa Francisco mai Timor-Leste!
TATOLI
