DILI, 09 Setembru 2024 (TATOLI) – Manuel da Silva, ne’ebé sofre Asidente Vaskulár Serebra (AVC) durante tinan hitu, lakolen hodi hein oras ba oras iha dalan Papa Francisco tanba hakarak simu bensaun husi nia.
Nia relata katak hetan moras ne’e dezde 2017 no halo tratamentu iha fatin bá fatin, maibé rezultadu mak laiha mudana. Tanba ne’e, bainhira rona Papa Francisco vizita Timor-Leste, nia ejize ba nia oan sira atu rejista mós nia naran hodi sai peregrinu ida atu partisipa iha atividade sira ne’ebé relasiona ho prezensa Papa nian.
“Ha’u moras [stuck] ne’e husi parte liman no ain loos mak la book-aan dezde 2017. Tamba ne’e, ha’u hakarak mai haree Papa Francisco hodi husu nia bensaun”, Manuel hateten ba Tatoli bainhira hein iha dalan protokolu Comoro, ohin.
Nia dehan Papa hadomi ema hotu no hadomi mós katuas no ferik, labarik no joven sira, inklui ema sira ne’ebé moras. Tanba ne’e ho oportunidade ida ne’e nia esforsu maski tuur de’it iha kadeira roda no ajuda husi nia oan sira no konsege to’o iha fatin Papa atu liu.
“Ha’u iha esperansa boot Papa sei haree ami moras sira, bainhira nia liu iha ami-nia oin. Tan ne’e, ha’u husi ba oan sira atu tau iha fatin ne’ebé Papa liu Mai atu nia bele hare ha’u-nia kondisaun ne’e”, nia espera.
Manuel da Silva antes ne’e hala’o profisaun nu’udar profesor husi 2003 to’o 2017. Bainhira sofre tiha moras AVC, nia labele kontinua hanorin. Entre 2003 no 2004, hanorin iha EBC Comoro depois 2005 muda ba EBC Manleuana. Tama ba krize 2006 nia para tiha hanorin no fali 2008 to’o 2017 iha EBC Manleu to’o hetan moras.
Nia dezeju hodi hein Papa Francisco tanpa hakarak hetan fali kondisaun di’ak, tanba nia hadomi tebes profisaun ne’e hakarak filafali bá eskola hodi hanorin labarik sira atu forma jerasaun foun sira.
Papa Farncisco hala’o vizita pastorál iha Timor-Leste entre loron 09 no 11 Setembru hafoin kontinua nia viajen ba Singapura.
Tuir observasaun, sarani katólika Timor-Leste entuziazmu simu Papa Francisco husi Aeroportu Internasionál Nicolau Lobato to’o Nunsiatura Apostólika iha Motael.
Notísia relevante: “Ha’u kontente haree amu papa nia oin” – Sarani
Jornalista:Tomé Amado
Editora: Maria Auxiliadora
