DILI, 09 setembru 2024 (TATOLI) – Tuir ajenda ne’ebé fó sai ona,ohin, Sua Santidade Papa Francisco to’o ona Timor-Leste holusi Papua Nova Guiné no liu ba deskansa iha Nunsiatura Apostolika Vatikanu iha Faról, nune’e iha tuku 06:30 loraik, vizita Palásiu Prezidensiál hodi hala’o enkontru ho Prezidente Repúblika, José Ramos Horta,
Durante vizita Papa Francisco iha Palásiu Prezidensiál sei hala’o reuniaun ho Xefe Estadu, José Ramos Horta, nune’e kontinua kedan hala’o enkontru ho entidade hotu iha Timor-Leste, hanesan lider relijiaun sira, sosiedade sivíl no seluk tan iha Salaun Xina Palásiu Prezidensiál.
Tuir observasaun jornalista TATOLI iha resintu Palásiu Prezidensiál hahú tuku 14:00 to’o 16:00 loraik ekipa Palásiu Prezidensiál no Governu hala’o preparasaun ne’ebé másimu hodi simu bainaka espesiál sira ne’ebé sei akompaiña iha vizita ne’e.
Seguransa ne’ebé organiza hosi FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) másimu hodi koloka ema hotu ne’ebé sei partisipa iha eventu ne’e tuir idaidak nia fatin.
Maske oras sei naruk maibé membru Governu balu hahú tama ona mai Palásiu Prezidensiál hanesan Ministru Tarnsporte no Komunikasaun (MTK) Miguel Manetelu no membru Governu seluk tan.
Iha vizita Papa Francisco iha Palásiu Prezidensiál fó oportunidade ba funsionáriu iha Palásiu Prezidensiál atu ema ida lori nia familia ida.
Tanba ne’e, Sarani Katolíka, Armanda de Araujo ne’ebé nia oan mane servisu iha Palásiu Prezidensiál espresa nia sentimentu katak, “ha’u sente kontente tebes, tanba bele haree direta Amu Papa, ha’u nia oan servisu iha ne’e mak nia lori ha’u mai, kontente lois bele sama Palásiu no simu bensaun husi Amu Papa”,
Nia dehan, fiar katak ho vizita Papa nian bele lori dame no domin ba timoroan hotu atu lolon liman ba malu hodi kontribui ba dezenvolvimentu.
“Papa nia vizita ne’e bele lori pás no dame mai ita timoroan, liuliu ba ita nia lider sira atu fó liman ba malu hodi lori nasaun ne’e ba oin, nune’e mós ba joven sira bele mós fó dame ba malu labele kria tan problema ba malu,” Armanda espresa ho oin midar ba Agêncis TATOLI.
Armanda hosi Muníspiu Ermera ne’ebé radilalmente ba relijiaun katólika iha esperansa despois vizita Papa Timor-Leste sei sai nasaun ne’ebé la nakonu ho konflitu no hatene ona fó perdaun ba malu.
Jornalista: Hortencio Sanchez
Editór: Florencio Miranda Ximenes
