VANIMO, 08 september 2024 (TATOLI) – Papa Francisco viajen ba Vanimo, nu’udar sidade remota liu iha Papua-Nova Guiné, hodi distribui apoiu umanitáriu.
Distribuisaun ajudu umanitáriu ne’e hanesan asaun karidade hodi agradese misionáriu Katóliku ne’ebé mak fo aan tomak hodi haklaken Nai Maromak nia evanjellu iha fatin refere. Ajudu umanitáriu referidu, inklui ai-moruk, instrumentu muzikál no sasan nesesáriu seluk.
Papa semo ho Aviaun Forsa Aero Austrália C-130 husi Port Moresby ba Vanimo. Vanimo sidade kiikoan ida lokaliza iha parte norte PNG ne’ebé baliza direta ho Jayapura, kapitál Provinsia Papua Osidentál, Indonézia.
Iha Vanimo, Santu Padre hasoru lider komunitáriu, no misionariu balun husi Argentina, ne’ebé mak haklaken evanjellu iha ne’ebá kleur ona.
Iha nia diskursu, Amu Papa habelar mensajen domin no armonia ba Sarani Katóliku iha Vanimo.
Komunidade lokál hamutuk 20,000 simu Santu Padre ho dansa tradisionál no hatais tradisionál oioin ne’ebé enfeita ho kor oioin, ai-funan, no ai-tahan oioin. Durante sermonia bemvinda, reprezentate grupu komunidade taka sapeo manu fulun ida ba Papa Francisco nia ulun.
Iha vizita ne’e, Papa husu komunidade Vanimo atu serbisu hamutuk hodi hari dame no evita atakamalu no bakumalu entre grupu tribu.
Santu Padre mos husu fiar-nain Katóliku sira atu evita violensia, infidelidade, exploitasaun, alcohol no droga.
Rekorda hikas katak, Papa Francisco iha ninia diskursu konklave iha 2013, Santu Padre emfaze importansia husi hakbesik evanjellu ba área remota, no promesa ne’e, ohin Papa realiza ho nia viajen ba Vanimo. .
Populasaun Vanimo hamutuk 11,000 no Vanimo laiha koneksaun Estrada direta ba kapitál Port Moresby. Dalan uniku atu asesu no vizita Vanimo mak viajen ho aviaun.
Iha segunda (09/09), Papa Francisco sei aranka ba Timor-Leste nu’udar nasaun datoluk husi ninia vizita ba ASEAN no Pasifiku. Papa Francisco sei to’o iha Aeroportu Internasional Nicolau Lobato Dili mais ou menus tuku 14.10 oras Timor-Leste.
Journalista: Filomeno Martins
Editor: Rafael Ximenes de A. Belo
