Peregrinu na’in-6.261 husi Viqueque hahú viajén mai Dili
DILI, 09 setembru 2024 (TATOLI)-Peregrinu husi munisípiu Viqueque, segunda ne’e, hahú viajén mai munisípiu Dili hodi simu vizita no partisipa misa solene husi Sua Santidade Papa Francisco, iha Tasi-Tolu.
Ekipa komisaun akompaña peregrinu munisípiu Viqueque, Marito da Costa, relata, peregrinu munisípiu Viqueque sai husi munisípiu tuku 09:00, dadeer, nune’e daudaun ne’e foin tama Gariuai, munisípiu Baucau, posiblidade to’o iha fatin konsetrasaun iha Hera tuku 16:00 lokraik, karik laiha engrafamentu ruma tuir dalan.
“Ami ohin sai husi Viqueque tuku 9 dadeer, agora ami tama ona Baucau, peregrinu husi postu lima ne’e ami la’o hamutuk”, Marito da Costa, hateten ba Agência Tatoli, via telefónika, ohin.
Marito hatutan, viajén peregrinu sira husi munisípiu Viqueque ne’e hetan akompaña husi Polísia Nasionál Timor Leste (PNTL) munisípiu Viqueque no FALINTIL-Forsa Defeza Timor Leste (F-FDTL).
“Viajen ida-ne’e akompaña husi ita-nia seguransa, iha parte ohin komadante PNTL munisípiu Viqueque no parte ikus komadante F-FDTL ho membru sira maka agora akompaña hela ami”, nia relata.
Nune’e, nia dehan, peregrinu sira orsida to’o fatin konsetrasaun no sei deskansa hodi aban ba partisipa misa solene ne’ebé perzide husi Sua Santidade Papa Franscisco.
Tuir dadús peregrinu husi munisípiu Viqueque totál hamutuk rihun 6.261 mai husi postu administrativu lima kompostu postu Viqueque 2.298, Ossu na’in-956, Uatulari 1.471, Uatucarbau na’in-522 no Lacluta 1.014. Ho totál transporte hamutuk unidade 128 hodi tula peregrinu sira husi munisípiu Viqueque.
Jornalista : Vitorino Lopes da Costa
Editor : Florencio Miranda Ximenes
