Peregrinu sira husi Viqueque to’o ona fatin konsentrasaun Hera
DILI, 09 setembru 2024 (TATOLI)-Peregrinu husi munisípiu Viqueque na’in-6.261 to’o ona fatin konsetrasaun ne’ebé Governu prepara, iha aldeia Mota Ki’ik, suku Hera, postu administrativu Cristu Rei, munisípiu Dili.
Komisaun akompaña peregrinu munisípiu Viqueque, Marito da Costa, informa, peregrinu Viqueque to’o ona iha fatin akampamentu Hera, iha tuku 17:30 lokraik no dadauk ne’e peregrinu sira to’o ho kondisaun di’ak.
“Ohin kalan ita-nia peregrinu sira deskansa, aban kontinua ba partisipa misa iha Tasi Tolu. Ami viajén husi Viqueque mai buat hotu la’o di’ak, tuir dalan karreta balun avaria, maibé ami konsege rezolve”, Marito da Costa, hateten ba Agência Tatoli, iha fatin akampamentu, Hera, ohin.
Nia reafirma, viajén husi Viqueque tuir dalan iha parte Loi-Hunu karreta tolu maka avaria, maibé komisaun konsege rezolve, depois to’o Subaun boot karreta ida mak avaria.
“Ita to’o fatin akampamentu ita-nia peregrinu sira ho kondisaun di’ak, laiha ema ida mak moras,” nia afirma.
Tuir dadús peregrinu husi munisípiu Viqueque totál hamutuk rihun 6.261 mai husi postu administrativu lima kompostu postu Viqueque rihun 2298, Ossu na’in-956, Uatulari rihun 1.471, Uatucarbau na’in-522 no Lacluta rihun 1.014. Ho totál transporte hamutuk unidade 128 hodi tula peregrinu sira husi munisípiu Viqueque.
Jornalista : Vitorino Lopes da Costa
Editór : Florencio Miranda Ximenes
