DILI, 09 setembru 2024 (TATOLI) – Segundu Komandante Jerál, Komisáriu Polísia, Pedro Belo, hateten Polísia Nasionál Timor-Leste (PNTL), asegura labarik minoridade na’in-rua tanba suspeita falsifika kartaun asesu ba partisipa misa iha Tasi-Tolu ne’ebé sei prezide husi Amu Papa.
Kazu ne’e akontese iha loron sábadu (7/9) foin lalais ne’e, iha área Becora iha labarik na’in-rua tenta falsifika kartaun asesu ba misa, ho aktu ne’e, polísia eskudra Cristo-Rei asegura kedan labarik na’in-rua ba eskuadra Dom Aleixo, hodi submete ba prosesu indentifikasaun.
“Ita-nia membru PNTL asegura joven minoridade na’in-rua, tanba deskonfia falsifika kartaun asesu misa iha Tasi-Tolu. Ita-nia membru PNTL sira kaer iha sábadu foin lalais ne’e. Prosesu ba sira lao tiha ona no ninia prosesu ne’e ba ona iha Ministériu Públiku”, Komisáriu Polísia, Pedro Belo dehan ba jornalista sira iha Sentru Formasaun Polísia Comoro, segunda, ohin.
Nia dehan, igreja autoriza ona katak ba hirak ne’ebé la rejistu iha direitu atu ba asiste misa ne’ebé sei prezide husi Amu Papa iha Tasi-Tolu tanba ne’e husu ba sidadaun sira labele halo tán falsifikasaun oioin.
“Laiha ema ida mai koko atu ba halo falsifikasaun tún sae, igreja autoriza tiha ona. Estadu autoriza tiha ona, sé mak la rejistu mós bele ba no iha oportunidade ba tuir misa hotu. Maibé nia fatin mak la hanesan. Maibé fatin ne’e hothotu iha hotu barikada laran, ne’ebé ba de’it lalika halo tún, halo sae para ema ba tuir misa, ita ba tur kadeia laran”, nia konklui.
Jornalista:Natalino Costa
Editór : Zezito Silva
