DILI, 09 setembru 2024 (TATOLI)— Ohin loron sai hanesan momentu istoriku daruak ba Timor-Leste hodi simu vizita Sua Santidade Papa Francisco nian, timoroan rihun ba rihun antuziasmu hodi hein iha dalan protokolu sira hanesan rotunda Prezidente Nicolau Lobato to’o iha Motael ba Nunsiatura Apostólika fatin deskansa sua santidade.
Husi dalan protokolu sira kada munisípiu prepara ona arku ho sentidu uma lulik sira, grupu tradisional sira hatais ho ida-idak nia kultura, hatudu tebe-tebe, bidu no hananu, hahu husi estudante sira, eskuteiru, akolitu, madre, padre, sarani nubun bo’ot kontinua hein ho kontente maske tahan kabun husi dader 07:00 OTL to’o 03:30 OTL.
Husi observasaun direta ne’ebé Tatoli halo iha terenu timoroan barak kontente tebes hodi simu Papa Francisco hodi hakilar viva Papa Francisco, maibé liu tiha ida ne’e ema idak-idak fila ba uma no fatin deskansa husik hela lixu barak hanesan akua mamuk, plastiku, rebusadu kulit, tisu, inklui arku sira ne’ebé naksobun tun ba rai.
Sekretariu Asuntu Sosiais Munisípiu Aileu, Rogeiro da Conceição rekoñese tanbá konsentrasaun ema barak ho atitude no hahalok la hanesan, kontente simu Papa Francisco nian hodi sobu tiha arku ne’ebé sarani husi munisipíu Aileu prepara ona iha areador rotunda Prezidente Nicolau Lobato.
“Sua Santidade liu tiha sira kontente no alegria entaun sobu tiha arku sira ne’ebe mak tau iha dalan ninin hodi bele hare’e Amu Papa. Hau nia hanoin sira la agradese ba ema nia sakrifisiu ne’ebé ema halo durante momentu lubuk ida hodi lori arku sira mai hatur to’o ohin to’o ikus situasaun rungu ranga hela,” dehan Rogerio da Conceição ba Tatoli.
Nia esplika, arku Munisípiu Aileu ne’ebé halo iha rotunda Prezidente Nicolau Lobato reprezenta husi Parókia ha’at diferente hanesan Parókia São Pedro no São Paulo Aileu, Santo Francisco de Assis Dare, São José Operario Remexiu no Parókia Santa Maria de Grasa Liquidoe.
Rogeiro da Conceição hateten maske nune’e ekipa husi parókia ha’at sei servisu hamutuk hodi hari fila fali arku ne’ebé naksobun ona, inklui hamos lixu ne’ebé sarani no peregriñu sira husik hela.
“Ami husi vigararia Aileu ami sei hadia fali arku sira aat no hodi koloka fali nune’e aban Sua Santidade ba Misa iha Tasitolu bele liu husi ne’e hare’e ba diak. Ita kontente deit maibe ita la tau interese ba lixu sira ita kaer iha ita nia liman, hodi soe hela iha sidade laran ida ne’e ladiak. Tuir los hanesan sarani tenke kolekta lixu sira hodi ba tau iha fatin lixu maibe depois hemu hamriik ba deit hodi husik hela fatin ne’e,” Nia dehan.
Jornalista Tatoli kontinua halo mós observasaun husi dalan protokolu ne’ebé Papa Francisco liu hahu husi rotunda Prezidente Nicolau Lobato, Sentru Formasaun Polisia (CFP), Ponte CPLP, Timor Plaza, Fatuhada, Kampung Alor, mai Motael hasoru problema hanesan nakonu ho lixu sira.
Maske nune’e iha fatin balun ekipa voluntaria husi governu no igreja kontinua halo limpeza no hari fila fali arku sira ne’ebé monu ona. “Ami hili lixu no akua sira, tisu sira, ohin hafoin Papa liu tiha mak ami hahu,” dehan Membru Ekipa Voluntariu ba Simu Papa Francisco, Natalia Gama.
Jornalista : Cidalia Fátima
Editora : Armandina Moniz
