BAUCAU, 09 setembru 2024 (TATOLI) – Sarani sira husi munisípiu Baucau hamutuk rihun 15-resin to’o ona iha fatin akampamentu no sei partisipa misa solene iha Tasi-Tolu, Dili.
Peregrinu sira husi munisípiu Baucau hahú iha viazen hosi Baucau iha ohin, segunda 09 setembru, purvolta oras 09:00 dadeer no to’o iha fatin akampamentu purvolta oras 13:30.
Antes ne’e, peregrinu sira konsentra hamutuk iha Igreja Katedrál, Vila Antiga no akompaña husi relijiozu, autoridade administrasaun inklui hetan seguransa husi komandu Polísia Nasionál Timor-Leste (PNTL) munisípiu Baucau.
“Sira hotu prezensa iha-ne’e, hakarak simu bensaun husi Papa Francisco,” Vise-Prezidente Komisaun Organizadora Munisipál Baucau, Padre Parókia Santo Antonio, Manuel Ximenes, SDB informa ba Agência TATOLI iha Comoro, segunda ne’e.
Padre Manuel, argumenta, prezensa iha Dili nu’udar sentidu rekoñese sira-nia identidade hanesan sarani Katólika nune’e sei partisipa no haree direitamente Papa Francisco iha Timor-Leste.
Peregrinu husi munisípiu Baucau atu’al iha kondisaun di’ak no kontinua deskansa iha fatin akontanamentu área Bairu-Pité hodi hein aban sei partisipa misa solene ne’ebé prezide direita husi Papa Francisco iha Tasi-Tolu, 10 setembru.
Peregrinu sira utiliza karreta ne’ebé fasilita husi Governu inklui karreta privadu no hetan atributu sira hanesan kamizola, salurik, xapeu no seluk tán.
“Ida-ne’e la’ós paseiu maibé hanesan peregrinasaun espirituál hodi aprofunda ita-nia fiar,” Padre Manuel akresenta.
Padre Parókia ne’e fo mensajen ba peregrinu sira atu aproveita ho vizita Papa Francisco tanba sai vigáriu kristu nian nune’e moris iha dame, domim Maromak hanesan Jesus kristu nia hanorin.
Tuir dadus totál númeru peregrinu husi munisípiu Baucau rihun 15-resin ne’ebé mai husi postu administrativu neen no suku 59.
Jornalista : Natalino Belo
Editór : Evaristo Soares Martins
