DILI, 09 setembru 2024(TATOLI) – Sarani munisípiu Baucau entuziasmu simu Papa Francisco ho tebe tradisionál no moradór iha estrada ponte komunidade ko’alia lian portugés (CPLP, sigla portugés), Comoro, Dili.
Kapitaun jerál moradór munisípiu Baucau, Jorge Ximenes Mendonça, sente kontenti tanba lidera ekipa hodi aprezenta dansa kultura ho hananu lian materna makasa’e inklui tambór hodi simu Papa Francisco mai Timor-Leste.
“Ida-ne’e hanesan oportunidade, ema hotu hakarak simu Papa maibé ami sai nu’udar moradores reprezentante munisípiu hodi hamriik iha-ne’e,” Kapitaun Jerál Moradór Munisípiu Baucau informa ba Agência TATOLI iha Komoro, Dili, segunda ne’e.
Maske hasoru dezafiu no fallansu durante halo preparasaun maibé ida-ne’e la’ós sai barreira no redús entuziasmu partisipa direita durante vizita Papa Francisco.
Jorge Mendonça, espera ho vizita Papa Francisco bele fó dame, domin no pás liuliu joven sira tenke muda hahalok hodi kria estabilidade iha Timor-Leste.
“Hau-nia hakarak Papa mai ho grasa no domin nune’e fila bele haraik hela dame mai ita,” Jorge Mendonça akresenta.
Alende ne’e, husu mós bensaun ba líder nasionál sira hodi hadame malu nune’e bele hamutuk dezenvolve no fó moris di’ak ba povu iha Timor-Leste.
Tuir observesaun Agência TATOLI iha terrenu, sarani hamutuk ho komisaun lokál munisípiu Baucau hahú prepara aan iha fatin determinadu hodi he’in simu Papa Francisco ho situasaun hakmatek no nakonu ho entuziasmu.
Jornalista : Natalino Belo
Editór : Evaristo Soares Martins
